لاہور (2 اگست 2025): وزیر اعلیٰ پنجاب مریم نواز کا کہنا ہے کہ فیلڈ مارشل آرمی چیف جنرل عاصم منیر کی قیادت میں مسلح افواج نے تحفظ آزادی کی تاریخ میں سنہری باب کا اضافہ کیا۔
وزیر اعلیٰ مریم نواز کی ہدایت پر اناسیویں (79) یوم آزادی کو شایان شان طریقے سے منانے کا آغاز کر دیا گیا۔ اس سال جشنِ آزادی کی تقریبات ’معرکہ حق‘ میں پاکستان کی فتح کے جذبے سے منائی جا رہی ہیں۔ جشن آزادی کی تقریبات کا عنوان ’حصولِ آزادی سے تحفظِ آزادی تک‘ رکھا گیا ہے۔
مریم نواز نے پنجاب بھر میں جشن آزادی کی تقاریب منعقد کرنے کی ہدایت کی، ہر ڈسڑکٹ میں جشن آزادی کی خصوصی سرگرمیاں کو آج سے آغاز ہوگیا ہے۔ یکم سے 14 اگست تک کی سرگرمیوں کو حتمی شکل پہلے ہی دی جا چکی ہے۔ یوم آزادی کی مرکزی تقریب 14 اگست کو حضوری باغ میں ہوگی جہاں وزیر اعلیٰ پنجاب قومی پرچم لہرائیں گی۔
یہ بھی پڑھیں: پنجاب کے عوام کو بنیادی سہولتیں دہلیز پر فراہم کر رہے ہیں، مریم نواز
وہ 14 اگست کو ایکسپو سینٹر لاہور میں ’معرکہ حق پارک‘، ’معرکہ حق میوزیم‘ اور ’یادگار معرکہ حق‘ کی نقاب کشائی کریں گی۔ عوام کے تمام طبقات کی بھرپور شرکت کے ساتھ تقریبات منعقد کی جائیں گی، گھروں، دکانوں، بازاروں کو قومی پرچموں اور جھنڈیوں سے سجایا جائے گا۔
اس حوالے سے مریم نواز نے اپنے پیغام میں کہا کہ معرکہ حق نے آزادی اور اس کے جشن کی اہمیت بڑھا دی ہے اور قوم کو سمجھا بھی دی ہے، فیلڈ مارشل آرمی چیف جنرل عاصم منیر کی قیادت میں ہماری بہادر مسلح افواج نے تحفظ آزادی کی تاریخ میں سنہری باب کا اضافہ کیا۔
انہوں نے کہا کہ قوم نے اپنی بہادر مسلح افواج کے ساتھ مل کر ثابت کیا کہ ہم اپنی آزادی کی حفاظت کرنا جانتے ہیں، ماؤں، بہنوں، بیٹیوں، بیٹوں، بھائیوں اور بزرگوں سے اپیل کرتی ہوں کہ یوم آزادی کی تقریبات میں بھرپور حصہ لیں، دکھا دیں کہ ہم زندہ اور باوقار قوم ہیں۔