لاہور: وزیر اعلیٰ پنجاب مریم نواز نے صرف پنجاب کیلیے بجلی سستی کرنے پر اعتراض اٹھانے والے ایم کیو ایم رہنما مصطفیٰ کمال کو جواب دے دیا۔
مریم نواز نے سماجی رابطوں کی سائٹ ایکس (سابق ٹوئٹر) پر مصطفیٰ کمال کو مخاطب کرتے ہوئے لکھا کہ پنجاب نے یہ ریلیف مفت میں نہیں لیا بلکہ عوام کیلیے پیسے دے کر لیا ہے۔
وزیر اعلیٰ نے لکھا کہ پنجاب نے اپنے بجٹ سے 45 ارب روپے ادا کیے ہیں، مجھے خوشی ہوگی اگر آپ بھی حکومت سندھ سے بات کریں اور صوبائی حکومت بھی عوام کو ریلیف فراہم کرے۔
مریم نواز کے جوابی ٹوئٹ پر مصطفیٰ کمال نے لکھا کہ آپ کے قیمتی مشورے کا شکریہ ادا کرتا ہوں لیکن اگر سندھ حکومت کا حسن اخلاق اور برتاؤ پچھلے 15 سالوں سے اتنا ہی اچھا ہوتا تو ہمیں کیا ضرورت تھی کہ 2024 کے الیکشن سے 4 ماہ قبل ہم لاہور آ کر آپ کی پارٹی کے ساتھ غیر مشروط حمایت کا اعلان کر ڈالتے جس پر آج تک ہم قائم ہیں۔
مصطفیٰ کمال نے لکھا کہ میں نے آج اپنی پریس کانفرنس میں پنجاب حکومت سے درخواست نہیں کی بلکہ ریاست پاکستان کے سربراہ وزیر اعظم شہباز شریف ہیں، ہم نے ان سے درخواست کی ہے کہ خدارا سندھ بالخصوص کراچی پر رحم کریں، ہمیں بھی پاکستان میں برابر کا شہری سمجھ کر جینے کا حق دیں کیونکہ ریاست ماں جیسی ہوتی ہے۔
ایم کیو ایم رہنما نے مزید لکھا کہ پچھلے کئی ماہ سے وزیر اعظم شہباز شریف سے ملاقاتوں میں بارہا اس بات کی طرف توجہ دلائی ہے، انہوں نے سندھ بالخصوص کراچی اور حیدرآباد سمیت سندھ کے شہری علاقوں کے رہنے والوں کیلیے آسانیاں پیدا کرنے کا وعدہ کیا تھا، ہم صرف انہی وعدوں کی تکمیل کے منتظر ہیں۔
اس سے قبل مصطفیٰ کمال نے اپنی پریس کانفرنس میں کہا تھا کہ نواز شریف کو پنجاب کا نہیں پاکستان کا لیڈر سمجھتے تھے لیکن ان کی پریس کانفرنس کے بعد سوچنے پر مجبور ہیں کہ اگر ہم پنجاب کا حصہ نہیں تو کیا ریلیف نہیں ملے گا؟
ایم کیوایم رہنما نے کہا تھا کہ سندھ میں کوئی پیکیج نہیں، وفاق کہتا ہے صوبائی حکومت سے بات کرو، ہم سندھ حکومت کے نہیں آپ کے پارٹنر ہیں، بجلی کی قیمت میں اٹھارہ روپے یونٹ کمی کر کے پورے ملک میں ایک ہی نرخ مقرر کیا جائے۔