لاہور (13 جولائی 2025): وزیر اعلیٰ پنجاب مریم نواز کی ہدایت پر صوبے کی فضائی حدود میں مسافر طیاروں کی حفاظت کیلیے اہم اقدام اٹھا لیا گیا۔
محفوظ فضائی سفر کیلیے مریم نواز کی ہدایت پر ڈسٹرکٹ ایڈمنسٹریشن وائلڈ لائف اور انوائرمنٹ پروٹیکشن اتھارٹی کو متحرک کر دیا گیا جبکہ لاہور کے مختلف علاقوں کو ’نو برڈ زون‘ بنانے کیلیے رنگ فینسنگ (فضائی حفاظتی حصار بنانے) کا فیصلہ کر لیا گیا۔
وزیر اعلیٰ پنجاب نے مسافر جہازوں کی حفاظت کیلیے گرینڈ آپریشن کرنے اور سینئر صوبائی وزیر مریم اورنگزیب کو پنجاب کی پہلی وائلڈ لائف فورس کو متحرک کرنے کی ہدایت کر دی۔
یہ بھی پڑھیں: مسلم لیگ (ن) عوام کی امید بن چکی ہے، مریم نواز
فیصلہ کیا گیا ہے کہ ہوائی اڈوں کے قریب موجود غیر قانونی مذبح خانوں اور پولٹری فارمز کا خاتمہ کیا جائے گا اور ایئرپورٹس کے قریب موجود بیکریوں کا کچرا ٹھکانے کے قانون اور ضابطوں پر عملدرآمد کروایا جائے گا۔
اس سلسلے میں جاری کیے گئے نوٹیفکیشن کے مطابق ماحولیاتی حفاظتی انتظامات کے بغیر قائم پولٹری فارمز، بیکریوں اور ذبح خانوں پر پابندی لگائی جائے گی، چمڑا رنگنے اور چمڑے سے اشیا بنانے والی کمپنیوں پر ماحولیاتی ضابطوں کا سخت اطلاق ہوگا، ہوائی اڈوں کے قریب کوڑا کرکٹ پھینکنے پر مکمل پابندی ہوگی، ڈھکن والے کوڑے دانوں کا استعمال لازمی قرار دیا گیا۔
نوٹیفکیشن کے مطابق وائلڈ لائف رینجرز کو آپریشن شروع کرنے کا حکم مل گیا، ایئرپورٹس کے قریب پرندوں کو جمع ہونے والی وجوہات ختم کی جائیں گی، وائلڈ لائف رینجرز، ضلعی انتظامیہ اور متعلقہ ادارے کارروائی کریں گے اور قانون پر سختی سے عمل درآمد کروایا جائے گا۔
اس میں مزید کہا گیا کہ خلاف ورزی پر گرفتاریاں، سزائیں اور جرمانے ہوں گے، ہوائی اڈوں کے قریب کچرے کے ڈھیر جمع ہونے کا خاتمہ یقینیبنایا جائے گا۔
سینئر صوبائی وزیر مریم اورنگزیب نے کہا کہ فضائی سفر کو محفوظ بنانے کیلیے اقدامات کیے جا رہے ہیں، فضائی حفاظتی حصار کے ذریعے پرندوں کے طیاروں سے ٹکراؤ اور حادثات میں کمی ہوگی، دنیا بھر کے ہوائی اڈوں کے قریب ’نو برڈ زون‘ بنائے جاتے ہیں۔