پاکستانی فلم اور ڈرامہ انڈسٹری کی معروف اداکارہ ماورا حسین نے کہا ہے کہ یہ سوچنا کہ محبت آپ کی زندگی کے تمام مسائل کو ختم کردے گی، بالکل غلط ہے۔
ایک انٹرویو میں گفتگو کرتے ہوئے انہوں نے کہا کہ پیار اور محبت غلط بات نہیں ہے لیکن یہ سوچنا کہ ہم محنت بھی نہ کریں اور کوئی شہزادہ ہمیں بچا لے گا، یہ بے وقوفی والی بات ہے لیکن ہمارے معاشرے میں لڑکیاں ایسے ہی سوچتی ہیں۔
اداکارہ نے کہا کہ پیار و محبت میں پاگل ہوجانا غلط ہے، محبت ایک دوسرے کی زندگی میں دخل اندازی کرنا نہیں ہے بلکہ یہ ایک پُرسکون احساس ہے، آپ کا ساتھی یہ سمجھے کہ آپ کے لیے کیا اہم ہے اور آپ کس چیز کے لیے پرُجوش ہیں۔
انہوں نے کہا کہ میں محبت میں گرفتار ہونے کے خلاف نہیں ہوں لیکن یہ سوچنا کہ محبت آپ کی زندگی کے تمام مسائل کو ختم کردے گی، بالکل غلط ہے، رشتے میں خواہش اور محبت سر پر سوار نہیں کرنی چاہیے، دونوں کو برابر لے کر چلنا چاہیے۔
ماورا حسین نے اپنے نکاح سے متعلق مداحوں کو آگاہ کردیا
شادی کرتے ہوئے نکاح نامے میں طلاق کی شق کے حوالے سے بات کرتے ہوئے انہوں نے کہا کہ میں نے ابھی تو اس بارے میں کچھ نہیں سوچا لیکن جب وقت آئے گا تو اپنے ساتھی کے ساتھ نکاح نامے کی تمام شقوں پر بات کروں گی کیونکہ دونوں کو برابر کے حقوق ملنے چاہیے۔
انہوں نے شادی کے لیے جیون ساتھی ملنے کے بارے میں سوال پر بات کرتے ہوئے کہا کہ جب کوئی ملے گا تو سوشل میڈیا پر سب کو پتہ چل جائے گا۔
ان کا کہنا تھا کہ ڈرامے کے اسکرپٹ پر سائن کرتے ہوئے میں یہ نہیں سوچتی کہ اس میں سماجی پیغام نہیں ہے تو میں نہیں کروں گی، اگر اسکرپٹ میں جو پیغام دیا جارہا ہے وہ معاشرے کے لیے نقصان دہ ہے تو میں کوشش کرتی ہوں کہ وہ ڈراما نہ کروں۔‘