ورلڈ کپ میں افغانستان کے خلاف 201 رنز کی ناقابل شکست اننگز کھیلنے والے آسٹریلوی آل راؤنڈر گلین میکسویل نے کئی ریکارڈ اپنے نام کرلیے۔
ممبئی کے وانکھڈے اسٹیڈیم میں کھیلے گئے میچ میں گلین میکسویل کی 201 رنز کی ناقابل شکست اننگز کی بدولت آسٹریلیا نے افغانستان کو 3 وکٹوں سے شکست دے کر سیمی فائنل کے لیے کوالیفائی کرلیا۔
آسٹریلیا نے افغانستان کی جانب سے دیا جانے والا 292 رنز کا ہدف 46.5 اوورز میں 7 وکٹوں کے نقصان پر حاصل کرلیا۔
گلین میکسویل ہیمسٹرنگ انجری کے باوجود بیٹنگ کرتے رہے اور ورلڈ کپ کی تاریخ کی سب سے بڑی اننگز کھیلی، پیٹ کمنز اور میکسویل نے آٹھویں وکٹ کی شراکت میں 202 رنز بنائے، کپتان پیٹ کمنز 68 گیندوں پر 12 رنز بنا کر آؤٹ ہوئے۔
آسٹریلوی ٹاپ آرڈر ناکام رہا اور 7 کھلاڑی 91 رنز پر آؤٹ ہوئے تھے۔
افغانستان کی جانب سے نوین الحق، عظمت اللہ عمرزئی اور راشد خان نے دو، دو وکٹیں حاصل کیں۔
تاہم گلین میکسویل نے 201 رنز کی ناقابل شکست اننگز کھیل کئی ریکارڈ اپنے نام کرلیے ہیں، وہ ون ڈے انٹرنیشنل میں ڈبل سنچری اسکور کرنے والے پہلے آسٹریلوی بیٹر بن گئے ہیں۔
گلین میکسویل پہلے کرکٹر ہیں جنہوں نے ہدف کا تعاقب کرتے ہوئے ڈبل سنچری اسکور کی ہے، وہ ورلڈ کپ میں 201 رنز بنانے والے پہلے آسٹریلوی بیٹر ہیں۔
گلین میکسویل پہلے بیٹر ہیں جنہوں نے مڈل آرڈر میں بیٹنگ کرتے ہوئے ڈبل سنچری اسکور کی، وہ پہلے بیٹر ہیں جنہوں نے ورلڈ کپ میں تیز ترین ڈبل سنچری اسکور کی ہے، میکسویل پہلے بیٹر ہیں جنہوں نے نمبر پانچ پر بیٹنگ کرتے ہوئے یہ کارنامہ انجام دیا ہے۔