اسلام آباد: سینیٹ سیکرٹریٹ نے مطالبہ کیا ہے کہ 25 مئی کو یوم دوستی پاکستان و افریقہ قرار دیا جائے۔
تفصیلات کے مطابق چیئرمین سینیٹ سید یوسف رضا گیلانی کی قیادت میں سینیٹ آف پاکستان 22 مئی 2025 کو اپنے اجلاس کے دوران ایک تاریخی قرار داد منظور کرنے جا رہا ہے۔
اس قرارداد میں حکومت سے مطالبہ کیا گیا ہے کہ وہ 25 مئی کو پاکستان-افریقہ دوستی کے دن کے طور پر منانے کا اعلان کرے تاکہ دو طرفہ اور بین الاقوامی افریقی ممالک کے ساتھ باہمی تعاون کو بڑھایا جا سکے۔
اعلامیے میں سیکرٹریٹ نے کہا کہ 22 مئی کو اس سلسلے میں سینیٹ ایک قرارداد منظور کرے گا، چیئرمین سینیٹ کی ہدایت پر قرارداد آج سینیٹ اجلاس میں پیش کی جائے گی۔ اعلامیے کے مطابق سینیٹ اجلاس میں افریقی ممالک کے سفیروں اور ہائی کمشنرز کو مدعو کیا گیا ہے، سیکرٹریٹ کی جانب سے مہمانوں کے اعزاز میں استقبالیہ دیا جائے گا۔
اسلام آباد اور ریاض کو سسٹر سٹی قرار دینے کی تجویز
سینیٹ کا یہ بھی کہنا ہے کہ اس یوم دوستی کا مقصد افریقی ممالک سے عالمی تعاون کو فروغ دینا ہے، اور قرارداد کا مقصد پارلیمانی سفارت کاری کے ذریعے پاکستان کا مثبت چہرہ اجاگر کرنا ہے۔ واضح رہے کہ ہر سال 25 مئی کو پاکستان-افریق دوستی کا دن منانے کا یہ خیال چیئرمین سینیٹ نے پیش کیا ہے، جو چاہتے ہیں کہ افریقی براعظم کے ساتھ مضبوط اور کثیر جہتی تعاون قائم ہو۔