کوئٹہ : ایم ڈی کیٹ امتحان میں نقل کرانے والا گروہ پکڑا گیا جبکہ نقل کرنے والے پچاس طلبا و طالبات کو بھی حراست میں لے کر بلیو ٹوتھ ڈیوائسز برآمد کرلیں۔
تفصیلات کے مطابق ملک بھر کے میڈیکل اینڈ ڈینٹل کالجوں میں داخلے کیلئے ٹیسٹ لیا گیا، ڈاکٹر بننے کے ڈیڑھ لاکھ سےزائدخواہشمند شریک ہوئے۔
کوئٹہ میں میڈیکل کالجز داخلہ ٹیسٹ کےدوران نقل کرنے والوں کے خلاف کارروائی کی گئی ، وفاقی خفیہ ادارے کی اطلاع پر ایم ڈی کیٹ امتحان میں نقل کرانے والا گروہ پکڑا گیا جبکہ دو سہولت کاروں کو بھی گرفتار کرلیا گیا۔
اسلام آباد میں موجود فیڈرل پبلک سروس کمیشن کا ریٹائرڈ اہلکار بھی گینگ میں کارندہ نکلا جبکہ خفیہ ادارے کی اطلاع پر نقل کرنے والے پچاس طلبا و طالبات کو حراست میں لیا گیا ہے۔
ذرائع نے بتایا کہ گرفتار امیدواروں سے نقل میں استعمال ہونے والی بلیو ٹوتھ ڈیوائسز بھی برآمد ہوئی ہیں تاہم نقل کرانے کیلئے دو افراد کوئٹہ میں موجود تھے جنہیں پکڑ لیا گیا۔
نقل میں استعمال ڈیوائسز امیدواروں کو ایک لاکھ روپے میں فروخت کی گئیں، گرفتار امیدواروں میں سے بیشتر کا تعلق خیبرپختونخوا سے ہے، نقل کیلئے بڑی تعداد میں امیدواروں نے کوئٹہ میں رجسٹریشن کرائی تھی۔، جس کی مزید تحقیقات جاری ہیں۔