شوبز انڈسٹری کی معروف اداکارہ ماہ نور بلوچ کا کہنا ہے کہ انڈسٹری میں 55 برس کے مرد کو ہیرو بنا دیا جاتا ہے اور خاتون کو ماں کا کردار دے دیتے ہیں۔
معروف اداکارہ ماہ نور بلوچ نے حال ہی میں نجی ٹی وی کے پروگرام میں شرکت کی اور شوبز انڈسٹری اور ڈرامے کی کہانیوں سے متعلق اظہار خیال کیا۔
انہوں نے کہا کہ شوبز انڈسٹری میں 55 سے 60 سال کے بوڑھے مرد کو بھی لڑکے طور پر دکھایا جاتا ہے اور اسی عمر کی خاتون کو ماں کا کردار دیا جاتا ہے۔
ماہ نور بلوچ نے کہا کہ ہماری انڈسٹری میں صرف عاشقانہ کہانیاں دکھائی جاتی ہیں اور 60 سال کے بوڑھے مرد کو بھی اس سے کم عمر لڑکی سے عشق کرتے دکھایا جاتا ہے جو کہ بہت ہی غلط ہے۔
انہوں نے کہا کہ شاید یہ سب ڈرامہ میکرز کو اچھا لگتا ہو لیکن جب آپ عام لوگوں کی نظر سے دیکھیں تو یہ اچھا نہیں لگتا کیونکہ اب لوگوں کی سوچ بدل رہی ہے اور وہ اسے قبول نہیں کرتے۔
واضح رہے کہ اس سے قبل سینئر اداکارہ بشریٰ انصاری نے بھی ڈرامہ انڈسٹری میں اس قسم کے مواد پر سوال اٹھایا تھا انہوں نے ڈراموں میں گھریلو زیادتیوں اور خواتین کے کرداروں میں تھپڑوں کے مناظر اور کہانیوں سے اختلاف کیا تھا۔