اسحاق ڈار کو چوتھی مرتبہ وزیر بننے کا جنون تھا، مفتاح اسماعیل برس پڑے

مفتاح اسماعیل

اسلام آباد: سابق وزیر خزانہ مفتاح اسماعیل، اسحاق ڈار پر برس پڑے۔

اے آر وائی نیوز کے پروگرام ’دی رپورٹرز‘ میں گفتگو کرتے ہوئے سابق وزیر خزانہ مفتاح اسماعیل نے کہا کہ میرے خلاف شوز کرائے جاتے، ٹوئٹس ہوتے تھے میں سب سمجھتا تھا۔

انہوں نے کہا کہ اسحاق ڈار کو چتھی مرتبہ وزیر بننے کا جنون تھا، وہ لندن میں بیٹھ کر بہت مزاحمت کرتے تھے اس وجہ سے آئی ایم ایف پروگرام میں تاخیر ہوئی۔

مفتاح اسماعیل نے کہا کہ ایک روپیہ پیٹرول بڑھنے پر جنگ کی باتیں کی جاتی تھیں۔

سابق وزیر خزانہ نے کہا کہ جو بھی سیاسی حکومت آتی ہے مزید قرض بڑھا دیتی ہے، نوٹ چھاپنے، غلط ٹیکسز اور قرض بڑھانے کی وجہ سے مہنگائی ہے۔

انہوں نے کہا کہ آج سیاست بس اقتدار یا مخالفین کو انتقام کا نشانہ بنانے کو رہ گئی ہے، ایک دوسرے کی پگڑیاں اچھالنا چھوڑیں تو ملک ترقی کرے گا۔

مفتاح اسماعیل نے کہا پاکستان کی تین بڑی پارٹیاں اس وقت کچھ ڈیلیور نہیں کرپارہیں، تینوں پارٹیاں عوام کے مسائل اور مہنگائی پر بات نہیں کررہیں۔

انہوں نے کہا کہ ہم یہ سمجھتے ہیں ایک نئی پارٹی کی گنجائش ضروری ہے، شاہد خاقان عباسی، مصطفیٰ نواز کھوکھر، لشکری رئیسانی ساتھ ہیں، خواجہ محمد ہوتی سمیت ملک بھر سے دیگر اور لوگ بھی ساتھ ہیں۔

مفتاح اسماعیل نے کہا کہ ہم نے تعین کرلیا ہے کہ سیاسی پارٹی کی ضرورت اس وقت ہے، ہم نے ابھی یہ تعین نہیں کیا کہ پارٹی قیادت کس کے پاس ہونی چاہیے، گفتگو کررہے ہیں کہ کیا عوام ہم میں قیادت دیکھتی ہے۔

انہوں نے مزید کہا کہ ٹیکنو کریٹ باتیں کرنا اور مسائل سمجھنے کے ساتھ لوگوں کو قائل کرنا بھی ضروری ہے، عوام چاہیں گے تو ہم انشا اللہ عوام کے ساتھ چلیں گے۔