سرینگر: حریت کانفرنس کے رہنما میر واعظ عمر فاروق کا کہنا ہے کہ مقبوضہ جموں و کشمیر فرقہ وارانہ بھائی چارے کی شاندار تاریخ کا حامل ہے۔
کشمیر میڈیا سروس کے مطابق میر واعظ عمر فاروق نے سرینگر کی تاریخی جامع مسجد میں نماز جمعہ کے اجتماع سے خطاب میں کہا کہ مقبوضہ وادی میں مسلمانوں اور اقلیتی برادری کے مابین اعتماد و احترام کی فضا قائم رہی ہے۔
میر واعظ عمر فاروق نے کہا کہ کشمیر کی سکھ برادری انتہائی مشکل حالات میں مسلمانوں کے ساتھ کندھے سے کندھا ملا کر کھڑی ہے، سکھوں نے چھٹی سنگھ پورہ کے المناک واقعے کے وقت بھی مسلمانوں کے ساتھ بھائی چارے کو نبھایا۔
انہوں نے سکھ برادر ی کو ان کے مذہبی تہوار گرو پورب کی مبارک باد پیش کی۔
دوسری جانب مقبوضہ وادی میں بھارتی فورسز کے اہلکاروں کی مسلسل محاصرے اور تلاشی کی کارروائیاں جاری ہیں۔ اہلکار گھروں پر چھاپوں کے دوران نہتے کشمیریوں کو ہراساں کرتے ہیں۔
رپورٹ کے مطابق بھارتی فوجی گھریلو سامان اور قیمتی اشیاء کی لوٹ مار میں ملوث ہیں اور چھاپوں کے دوران نہتے کشمیریوں کو خوف و دہشت کا نشانہ بنا رہے ہیں۔ کشمیریوں کو بھارتی فوج اور پولیس کے مخبر بننے پر مجبور کیا جاتا ہے۔