ممبئی: بھارت کی سب سے زیادہ پسند کی جانے والی پرائم ویڈیو کی کرائم ویب سیریز ’مرزاپور‘ کے سیزن 3 کی ریلیز ڈیٹ کا اعلان کر دیا گیا۔
میڈیا رپورٹس کے مطابق مرزاپور سیزن 3 کی ریلیز ڈیٹ کا اعلان انوکھے انداز میں کیا گیا۔ پرائم ویڈیو نے انسٹاگرام پوسٹ میں ویب سیریز کے مرکزی کرداروں کا کیریکچر جاری کرتے ہوئے شائقین کو چیلنج کیا کہ اس میں چھپی ریلیز ڈیٹ تلاش کریں۔
ساتھ ہی اداکار علی فضل کی ویڈیو بھی جاری کی گئی جس میں وہ ریلیز ڈیٹ کی تلاش میں مصروف شائقین پر قہقہہ لگاتے ہوئے پوچھ رہے ہیں کہ ڈیٹ ڈھونڈنے آئے ہو نا؟
View this post on Instagram
وہ کہتے ہیں ’ڈیٹ مل جائے گی میں نے بھی ایسا ہی سوچا تھا لیکن یہ جو پیچھے دماغ والے لوگ ہیں نا یہ پہلے کھلائیں گے، پھر گھمائیں گے اور پھر تڑپائیں گے، پھر کچھ دنوں بعد ہماری پیشی ہوگی جہاں ہوگی آمنے سامنے بات‘۔
ویڈیو کے کیپشن میں پرائم ویڈیو نے شائقین سے پوچھا ’آ رہے ہیں نا پیشی میں ریلیز ڈیٹ معلوم کرنے؟‘
View this post on Instagram
یاد رہے کہ اس سے قبل 19 مارچ کو پرائم ویڈیو انڈیا کی جانب سے انسٹاگرام پر مختصر ویڈیو شیئر کی گئی تھی جس میں اداکار پرمود پاٹھک کو آم کھاتے ہوئے دیکھا گیا تھا۔
پرمود پاٹھک نے ویب سیریز میں جے پی یادو کا منفی کردار ادا کیا۔ ویڈیو میں ان سے تیسرے سیریز کی ریلیز سے متعلق سوال کیا جاتا ہے وہ 22 اگست 2024 کی تاریخ بتاتے ہیں۔
جب ان سے پوچھا گیا کہ یہ تاریخ بالکل طے ہے تو سامنے سے کہتے ہیں کہ ’لکھ کر لے لو، یہ سیاستدان کا وعدہ ہے‘۔ ’مرزاپور 3‘ کو جون میں ریلیز کیا جانا تھا لیکن اب اس کیلیے اگست تک انتطار کرنا پڑے گا۔
View this post on Instagram
رواں سال مارچ میں ویب سیریز کے تیسرے سیزن کی پہلی جھلک ایک تقریب میں شیئر کی گئی تھی۔ تیسرے سیزن کا اعلان اس کی کاسٹ میں شامل علی فضل، پنکج ترپاٹھی اور شویتا ترپاٹھی سمیت دیگر ستاروں کی موجودگی میں کیا گیا تھا۔
تقریب میں گفتگو کرتے ہوئے اداکار علی فضل نے کہا تھا کہ ’مرزا پور 3‘ اپنے ڈیبیو سیزن کی طرح جوہر برقرار رکھے گی، جہاں نئے کردار متعارف کروائے جائیں گے وہیں کچھ پرانے بھی بچھڑیں گے۔
’مرزاپور 3‘ کی شوٹنگ مہینوں پہلے مکمل ہوئی تھی اور تب سے شائقین اس کی ریلیز کے اعلان کا انتظار کر رہے ہیں۔ سیریز کا پہلا سیزن 16 نومبر 2018 کو ریلیز ہوا تھا جبکہ اس کا دوسرا سیزن اکتوبر 2020 میں آیا۔
تیسرے سیزن میں ’منا بھائی‘ کی واپسی سے متعلق پروڈیوسر نے بتایا تھا کہ بدقسمتی سے منا ترپاٹھی اس طرح سیریز میں واپس نہیں آ سکتے ہیں جس طرح لوگ توقع کر رہے ہیں تاہم ویب سیریز میں کچھ ایسا دلچسپ ہے جس کیلیے مداحوں کو انتظار کرنا پڑے گا۔
انہوں نے بتایا تھا کہ تیسرے پارٹ میں کچھ ایسا ہے جہاں منا بھیا دوبارہ اسکرین پر واپس آ سکتے ہیں۔
ویب سیریز کے پہلے سیزن میں خطرناک گینگسٹر کا کردار نبھانے پر اداکار دیوینندو کو بڑے پیمانے پر پذیرائی ملی، تاہم دوسرے سیزن میں منا بھیا کی ہلاکت سے مداحوں صدمہ پہنچا تھا، یہی وجہ ہے کہ تیسرے سیزن میں ان کی واپسی انتہائی اہمیت کی حامل ہے۔