ڈاکٹرز نے سرجری کر کے قیدی کے پیٹ سے کی پیڈ موبائل فون نکال لیا۔
بھارتی میڈیا رپورٹس کے مطابق پولیس نے بتایا کہ ایک سرکاری اسپتال کے ڈاکٹروں نے قیدی کے پیٹ سے ایک موبائل فون نکال لیا جسے اس نے نگل لیا تھا۔
حال ہی میں فون کی برآمدگی کے بعد حکام نے اس بات کی تحقیقات کا حکم دیا ہے کہ ممنوعہ شے کس طرح ہائی سکیورٹی والی جیل میں داخل ہوئی۔
قیدی کے خلاف فوجداری مقدمہ بھی درج کیا گیا ہے۔ 30 سالہ مجرم دولت عرف گنڈا 10 سال کی سزا کاٹ رہا ہے۔
24 جون کو اس نے پیٹ میں درد کی شکایت کی اور جیل کے طبی عملے کو بتایا کہ اس نے کوئی چیز نگل لی ہے۔
اسے مزید علاج کے لیے جیل کے عملے نے فوری طور پر شیواموگا کے گورنمنٹ میک گن اسپتال منتقل کیا جہاں ڈاکٹروں نے ایکسرے لیا جس میں اس کے پیٹ میں فون کی موجودگی کی تصدیق ہوئی۔
قیدی کی رضامندی حاصل کرنے کے بعد آپریشن کر کے فون نکال لیا گیا۔ یہ فون 8 جولائی کو سیل بند لفافے میں جیل حکام کے حوالے کیا گیا تھا۔