کراچی: بھارتی وزیر اعظم نریندر مودی نے پاکستان کی فضائی حدود استعمال کرتے ہوئے حکومت یا عوام کو خیر سگالی کا پیغام نہیں دیا۔
سول ایوی ایشن سے منسلک ذرائع نے اے آر وائی نیوز کو بتایا کہ بھارتی وزیر اعظم نریندر مودی کے طیارے نے پاکستان کی فضائی حدود استعمال کی، ان کا طیارہ 46 منٹ تک پاکستانی فضائی حدود میں محو پرواز رہا۔
ذرائع نے بتایا کہ روایت ہے فضائی حدود سے گزرتے ہوئے غیر ملکی صدر یا وزیر اعظم غیر سگالی پیغام دیتے ہیں لیکن نریندر مودی نے ایسا نہیں کیا۔
پولینڈ سے واپسی پر بھارتی وزیر اعظم کے طیارے نے پاکستانی فضائی حدود استعمال کی تھی۔ ان کا طیارہ صبح سوا دس بجے پاکستان کی حدود میں داخل ہوا، اور 11 بج کر ایک منٹ پر بھارت میں داخل ہوا۔
نریندر مودی کا طیارہ چترال کے اوپر سے پاکستان کی حدود میں داخل ہوا تھا۔ طیارہ اسلام آباد اور لاہور کے ایئر کنٹرول ایریا سے گزرا، طیارہ لاہور سے ہوتا ہوا امرتسر میں داخل ہوا۔
پاکستان ایئرپورٹ اتھارٹی کے ترجمان کا کہنا تھا کہ عالمی قوانین کے مطابق وی آئی پی مومنٹ کے طیاروں کو اجازت دی جاتی ہے، اس طرح کی موومنٹ سے متعلق پاکستان کی ایئرپورٹ اتھارٹی کو پہلے سے روٹ سے متعلق آگاہ کر دیا جاتا ہے۔