پاکستان کرکٹ بورڈ (پی سی بی) کی جانب سے قومی ٹیم کے اسکواڈ میں تبدیلیاں کی گئی ہیں۔
پاکستان شاہینز آج عرفان خان نیازی کی قیادت میں ڈارون (آسٹریلیا) روانہ ہوگی، پی سی بی کی جانب سے روانگی سے قبل اسکواڈ میں دو تبدیلیاں کی گئی ہیں۔
پاکستان کرکٹ بورڈ کے مطابق تنازعے کا شکار حیدر علی کی جگہ محمد فائق کو اسکواڈ کا حصہ بنایا گیا ہے جبکہ سلمان مرزا کی جگہ فاسٹ بولر محمد وسیم جونیئر کو ٹیم میں شامل کیا گیا ہے۔
واضح رہے کہ مڈل آرڈر بیٹر حیدر علی پاکستان شاہینز کا حصہ نہیں رہے کیونکہ انہیں پاکستان کرکٹ بورڈ نے انگلینڈ میں کریمنل کیس کی وجہ سے معطل کر دیا ہے۔
انگلش میڈیا کے مطابق حیدر علی کے خلاف کسی لڑکی نے شکایت درج کروائی ہے۔
ذرائع کا کہنا ہے کہ کرکٹر کو مانچسٹر پولیس نے ضمانت پر رہا کردیا ہے، تحقیقات مکمل ہونے تک وہ برطانیہ سے باہر نہیں جاسکیں گے، انہیں تین روز تک حراست میں رکھا گیا۔
قومی کرکٹر کا پاسپورٹ گریٹر مانچسٹر پولیس کی تحویل میں ہے، پولیس نے انہیں مزید تحقیقات کے کے لئے دو ہفتے بعد دوبارہ بلایا ہے۔
پاکستان بمقابلہ ویسٹ انڈیز، پہلا ون ڈے آج ہوگا
ذرائع کا کہنا ہے کہ پی سی بی نے پاکستان ہائی کمیشن کے ذریعے حیدر علی کو لیگل معاونت فراہم کی ہے، پاکستانی نژاد وکیل بیرسٹر معین علی کی خدمات انہیں فراہم کی گئی ہیں۔
یہ کیس مبینہ طور پر پاکستان شاہینز کے حالیہ دورہ انگلینڈ کے دوران پیش آنے والے واقعے سے متعلق ہے، حالانکہ پولیس یا پی سی بی کی جانب سے اس بارے میں کوئی خاص تفصیلات منظر عام پر نہیں لائی گئیں۔