قومی ٹیم کے ڈائریکٹر محمد حفیظ کو عملے نے جہاز میں سوار ہونے سے روک دیا۔
قومی ٹیم کے ڈائریکٹر محمد حفیظ کی جانب سے ڈسپلن کی خلاف ورزی پر کھلاڑیوں پر جرمانے کا عندیہ دیا گیا تھا لیکن اب انہوں نے خود ہی ڈسلپن توڑ دیا ہے۔
ذرائع کا کہنا ہے کہ محمد حفیظ نے میلبرن سے سڈنی جاتے ہوئے فلائٹ مس کردی۔
محمد حفیظ کو ٹیم کے ساتھ ہی میلبرن سے سڈنی سفر کرنا تھا، اہلیہ کی سیٹ بھی اسی فلائٹ میں بک تھی، دونوں ایئرپورٹ پر موجود تھے لیکن دیر سے پہنچنے پر عملے نے انہیں جہاز میں سوار ہونے سے روک دیا۔
محمد حفیظ اور ان کی اہلیہ بعد میں دوسری فلائٹ سے سڈنی پہنچے۔
واضح رہے کہ حفیظ کھلاڑیوں پر کوڈ آف کنڈکٹ کی خلاف ورزی پر جرمانوں کا اعلان کر چکے ہیں تاہم ان کی جانب سے خود ڈسپلن کی خلاف ورزی پر ٹیم انتظامیہ نے خاموشی اختیار کر رکھی ہے۔