پی ایس ایل 8 میں لاہور قلندرز کے خلاف میچ میں پشاور زلمی کے بیٹر محمد حارث کے بیٹ ٹوٹنے کی ممکنہ وجہ سامنے آگئی۔
پی ایس ایل 8 کے اہم میچ میں قلندرز کے فاسٹ بولر شاہین شاہ آفریدی کی گیند پر اوپنر بیٹر محمد حارث کا بیٹ ٹوٹ گیا تھا جس کے بعد اگلی ہی گیند پر وہ بولڈ ہوگئے تھے۔
اے آر وائی ڈیجیٹل کے پروگرام ’دی فورتھ امپائر ایکسپریس‘ میں سابق کپتان اظہر علی نے حارث کے بیٹ ٹوٹنے کی وجہ بیان کردی ہے۔
فہد مصطفیٰ نے اظہر علی سے پوچھا کہ ’شاہین کی گیند اتنی تیز تھی کہ بلا ٹوٹ گیا یا بیٹ کے ٹوٹنے سے تو بیٹر کا مورال وہی ختم ہوجاتا ہے۔
اظہر علی نے بتایا کہ ’یہ بیٹ بہت ڈرائی ہوگیا ہوگا یا پھر اس کے اندر ہلکا سا کریک ہوگا جس کا حارث کو علم نہیں ہوگا۔‘
سابق کپتان نے بتایا کہ ’بیٹر کو بیٹ کا بیلنس اتنا پسند ہوتا ہے کہ جب کسی وجہ سے دوسرا بیٹ منگوانا پڑے تو اسے ایسا لگتا ہے کہ عجیب سا بیٹ تھام لیا ہے۔‘
اظہر علی نے کہا کہ ’سارے بیٹ سے کھیلنا چاہیے کہ اگر کوئی بیٹ ٹوٹ جائے تو دوسرے بیٹ کی بھی عادت ہوجائے۔‘
انہوں نے مزید کہا کہ ’میرے خیال میں پہلے سے ہی بیٹ میں کریک آیا ہوا تھا تبھی ایسا ہوا ہے۔‘