شوبز انڈسٹری کی معروف اداکارہ مومنہ اقبال نے سوشل میڈیا پر کم فالوورز رکھنے والے اداکاروں کو انڈسٹری چھوڑنے کا مشورہ دے دیا۔
اے آر وائی ڈیجیٹل کے ڈرامہ سیریل ’احسان فراموش‘ میں شاندار اداکاری کے سبب شہرت کی بلندیوں پر پہنچنے والی اداکارہ مومنہ اقبال نے سوشل میڈیا پر ویڈیوز شیئر کی ہیں جس میں وہ شکوہ کرتے دکھائی دے رہی ہیں۔
مومنہ اقبال نے کہا کہ جن اداکاروں کے فالوورز کی تعداد بہت کم ہے، انہیں شوبز انڈسٹری چھوڑ دینی چاہیے کیونکہ کم فالوورز کے سبب وہ نہ تو فلموں میں کام کرسکیں گے اور نہ ہی ڈراموں میں انہیں کام ملے گا۔
انہوں نے شکوہ کرتے ہوئے کہا ہے کہ کم فالوورز کی وجہ سے شوبز میں کام نہ ملنے کے باعث وہ اب سوچ رہی ہیں کہ وہ اداکاری چھوڑ کر زندگی میں کچھ بڑا کریں یا وی لاگنگ شروع کر دیں۔
اداکارہ کا کہنا تھا کہ صبح سے سیٹ پر موجود تقریباً 10 لوگ انہیں یہ بتاچکے ہیں کہ سوشل میڈیا پر ان کے صرف 10 لاکھ فالوورز ہیں چونکہ سوشل میڈیا پر ان کے فالوورز کم ہیں اس لیے وہ ڈراموں میں کام نہیں کرسکیں گی۔
مومنہ اقبال نے کہا کہ انہیں انڈسٹری میں کام کرتے ہوئے کئی سال گزر چکے ہیں مگر تاحال انڈسٹری میں ان کی کوئی خاص اہمیت نہیں ہے اور اس کی وجہ سوشل میڈیا پر ان کے فالوورز کی تعداد کا کم ہونا ہے۔
واضح رہے کہ مومنہ اقبال ڈرامہ سیریل ’سمجھوتہ‘۔ اور ’احسان فراموش‘ سمیت متعدد ڈراموں میں اداکاری کے جوہر دکھا چکی ہیں۔