اسلام آباد : چیئرمین اوگرا کی ماہانہ تنخواہ کے حوالے سے ہوشربا انکشاف سامنے آیا ، وزیر انچارج برائے کابینہ ڈویژن نےتفصیلات پیش کر دیں۔
تفصیلات کے مطابق قومی اسمبلی کے اجلاس میں چیئرمین اوگرا، ممبران اور ایڈوائزرز کی تنخواہوں کی تفصیلات پیش کر دی گئیں۔
ایکسپریس نیوز کے مطابق وزیر انچارج برائے کابینہ ڈویژن نے تحریری جواب میں بتایا کہ چیئرمین اوگرا کی ماہانہ تنخواہ 15 لاکھ روپے مقرر ہے، جبکہ ممبر آئل اور ممبر فنانس کی ماہانہ تنخواہ 10 لاکھ روپے سے زائد ہے۔
وزیر انچارج کابینہ ڈویژن کا کہنا تھا کہ ڈاکٹر الیاس فضل، اعجاز سڈل اور بریگیڈیئر شہباز ایڈوائزرز کے طور پر تعینات ہیں، جن کا ماہانہ معاوضہ 8 لاکھ روپے مقرر ہے۔
ایڈوائزرز ابتدائی طور پر ایک سالہ کنٹریکٹ پر تعینات ہوتے ہیں، تاہم کنٹریکٹ میں 3 سال تک توسیع کی جا سکتی ہے۔
پیش کردہ دستاویز کے مطابق بریگیڈیئر شہباز کا سکیورٹی ایڈوائزر کا کنٹریکٹ 12 فروری 2025 کو ختم ہو چکا ہے۔
کابینہ ڈویژن نے مزید بتایا گیا کہ چیئرمین اوگرا کی تنخواہ سے 4 لاکھ 97 ہزار روپے سے زائد اور ممبر آئل و فنانس کی تنخواہ سے 2 لاکھ 77 ہزار 500 روپے ٹیکس کی کٹوتی کی جاتی ہے، اوگرا نے آرڈیننس 2002 کی سیکشن 14 کے تحت ایڈوائزرز کے عہدے تخلیق کیے تھے۔