تیار ہو جائیں! اگست کا پہلا ہفتہ ساتھ بارشیں بھی لا رہا ہے

اگست کا مہینہ بھی بارشیں لا رہا ہے اور پی ڈی ایم نے اس ماہ کے پہلے ہفتے میں ملک بھر میں کہیں ہلکی اور کہیں تیز بارش کی پیشگوئی کر دی ہے۔

ترجمان پی ڈی ایم اے کے مطابق اگست کے پہلے ہفتے میں کہیں ہلکی اور کہیں تیز بارش کا امکان ہے۔ دریائے راوی، چناب اور ستلج کے بالائی علاقوں میں طوفانی بارشیں ہوں گی جب کہ دریائے سندھ اور کابل کے بالائی علاقوں میں نسبتاً درمیانے درجے کی بارشیں ہوں گی۔

پی ڈی ایم اے کے مطابق آئندہ 24 گھنٹوں کے دوران راولپنڈی، ملتان، ڈیرہ غازی خان اور بہاولپور میں گرج چمک کے ساتھ بارش کا امکان ہے جب کہ گوجرانوالہ، سرگودھا، لاہور، فیصل آباد اور ساہیوال میں بھی بارش ہو سکتی ہے۔

ترجمان کا کہنا ہے کہ منگلا ڈیم 84 اور تربیلا ڈیم 85 فیصد پانی سے بھر چکے ہیں۔ 4 سے 6 اگست کے درمیان دریائے جہلم میں منگلا کے مقام پر اونچے درجے کا سیلاب متوقع ہے۔

پی ڈی ایم اے نے متعلقہ انتظامیہ کو بارشوں اور سیلاب کے پیش نظر الرٹ رہنے کی ہدایت بھی کی ہے۔