کے پی ایل: مظفر آباد ٹائیگرز، راولا کوٹ کو شکست دیکر فائنل میں پہنچ گئی

کشمیر پریمیئر لیگ میں مظفر آباد ٹائیگرز نے راولا کوٹ ہاکس کو 7 رنز سے شکست دے کر فائنل میں جگہ بنالی۔

تفصیلات کے مطابق مظفرآباد ٹائیگرز نے پہلے کھیلتے ہوئے 8 وکٹ پر 164 رنز بنائے جبکہ راولاکوٹ کی ٹیم آخری اوور میں 157 رنز بناکر آؤٹ ہوگئی۔

کوالیفائر میچ میں مظفر آباد ٹائیگرز کی ٹیم نے پہلے کھیلتے ہوئے 8 وکٹ پر 164 رنز بنائے، انور علی 57 رنز بناکر نمایاں رہے۔

عمران رندھاوا اور دانش عزیز نے دو، دو کھلاڑیوں کو آؤٹ کیا۔

جواب میں راولا کوٹ کی وکٹیں ہدف کے تعاقب میں وقفے وقفے سے گرتی رہیں، حسین کی 52 رنز اننگز بھی راولا کوٹ کو شکست سے نہ بچاسکی۔

آخری اوور میں دانش عزیز نے جارحانہ انداز اپنایا اور سہیل تنویر کے 19ویں اوور میں ایک چھکا اور ایک چوکا لگاکر ٹیم کو فتح کے قریب لے آئے تاہم سہیل تنویر نے مسلسل 2 گیندوں پر وکٹیں لے کر میچ کا پانسہ پلٹ دیا جبکہ راولا کوٹ کے آخری بیٹسمین رن آؤٹ ہوئے۔

مظفرآباد ٹائیگرز نے 7 رنز سے میچ جیت کر ایونٹ کے فائنل میں جگہ بنالی۔