اسلام آباد : پاکستان پیپلز پارٹی کے رہنما ندیم افضل چن نے جہانگیر ترین کی پی پی میں شمولیت کا اشارہ دے دیا۔
تفصیلات کے مطابق پاکستان پیپلز پارٹی کے رہنما ندیم افضل چن نے اے آر وائی پروگرام اعتراض ہے نے گفتگو میں کہا کہ پارٹی کوئی گیم نہیں کھیلتی، کوئی مشکل میں پڑتا ہے تو جمہوریت کے پڑدے کے پیچھے چھپتا ہے، کوئی جمہوریت کے پڑدے کے پیچھے چھپتا ہے تو پارٹی کی مددکی ضرورت پڑ جاتی ہے۔
رہنماوں کی پی پی میں شمولیت کے سوال پر ندیم افضل چن کا کہنا تھا کہ پنجاب میں متعدد لوگ پیپلزپارٹی میں آنا چاہتے ہیں لیکن حکومتی ہتھکنڈے پنجاب میں لوگوں کوپی پی میں شمولیت سے روکتے ہیں۔
جہانگیر ترین کے حوالے سے انھوں نے کہا کہ جہانگیر ترین پیپلزپارٹی میں آئے تو ہم انہیں خوش آمدید کہیں گے ، جہانگیر ترین نے کہا ہے اگر وہ سیاست کریں گے، تو مخدوم احمد محمود کے ساتھ کریں گے ، مخدوم احمد محمود پیپلزپارٹی جنوبی پنجاب کےصدراور سینئر رہنما ہیں، جہانگیر ترین کی پی پی میں شمولیت سے متعلق پھر ہاں ہی سمجھیں۔
پی پی رہنما کا کہنا تھا کہ جب کوئی جمہوریت کےنام پراقتدار کے مزے لیتا ہے تو پی پی میں قباہتیں نظرآتی ہیں، جمہوریت کے لیے پیپلزپارٹی سے زیادہ کسی نے قربانیاں نہیں دیں۔
انھوں نے بتایا کہ بے نظیر بھٹو کو مچھ جیل میں قید کیا گیا جہاں بجلی نہیں تھی، خاوند11سال جیل میں تھا، بے نظیر بھٹو کے بچے دربدر ہوگئے، انہوں نے کارکن کے ساتھ جدوجہد کی، کسی کی مشکلات کا موازنہ نہیں کیا جاتا، سہولتوں کا موازنہ کیا جاتا ہے۔
عمران خان سے متعلق سوال پر پیپلز پارٹی کے رہنما نے کہا کہ کسی کےلیے مشکل ہو یا نہیں لیکن جیل جیل ہوتی ہے، میں نے جب بانی پی ٹی آئی سے پہلی بار ملاقات کی انہیں کہا تھا جیل ریفارمز کریں، جو آج جمہوریت کے چیمپئن بنے ہوئے ہیں وہ پہلےکہتے تھے اسمبلی سے استعفیٰ دیں، پیپلزپارٹی نے اس وقت کہا استعفے نہیں دیں گے آئینی راستہ اختیار کریں گے، پیپلزپارٹی نے پی ڈی ایم بنائی پھر ہمیں پی ڈی ایم چھوڑنی پڑ گئی۔
ان کا مزید کہنا تھا کہ ابھی پیپلزپارٹی کے لیے ہوا سازگار بننے نہیں دی جارہی ، حکومت کی طرف سے پیپلزپارٹی کو اسپیس نہیں دیا جا رہا، پیپلزپارٹی نے مطالبہ کیا کہ ہمیں پنجاب میں اسپیس دیا جائے۔
رہنما پی پی نے کہا کہ پیپلزپارٹی کے بغیرکسی نے نظام چلانے کی کوشش کی تو وہ کامیاب نہیں ہوا، 2013 میں نواز شریف کے خلاف دھرنے لگے تو پیپلز پارٹی ساتھ کھڑی ہوئی، پیپلزپارٹی نظام کے ساتھ کھڑی رہی تو نظام سے فائدہ اٹھانے والے بچے رہیں گے۔
ندیم افضل کا کہنا تھا کہ بلاول بھٹو نے دنیا میں پاکستان کے بیانیے کی جنگ لڑی ، پیپلزپارٹی چاہتی ہےکہ یہ نظام اور جمہوریت چلتی رہے۔