نیشنل ایڈوانس ڈیٹابیس رجسٹریشن اتھارٹی (نادرا) نے ملک بھر کے شہریوں کے لیے انتباہ جاری کرتے ہوئے انہیں جعلسازوں سے ہوشیار رہنے کی ہدایت کی ہے۔
نادرا کی جانب سے جاری ایک اعلامیہ میں عوام الناس کو آگاہ کیا گیا ہے کہ نادرا دفاتر کے باہر کچھ افراد غیر قانونی طور پر شہریوں کو PAK-ID موبائل ایپ کے ذریعہ درخواستوں کی تیاری میں مدد دینے کے عوض پیسے وصول کر رہے ہیں۔
نادرا نے اس عمل کو مکمل طور پر غیر قانونی قرار دیتے ہوئے کہا ہے کہ نادرا کی تمام خدمات کی فیس سرکاری طور پر مقرر ہے اور کسی غیر مجاز کو پیسے وصول کرنے کا اختیار نہیں۔
نادرا کی جانب سے عوام الناس کو ایسے عناصر سے ہوشیار رہنے کا انتباہ جاری کرتے ہوئے ہدایت کی ہے کہ شہری کسی بھی فرد کو نادرا سے متعلق درخواست کے لیے پیسے نہ دیں اور صرف نادرا دفاتر، ویب سائٹ یا PAK-ID ایپ کے ذریعہ درخواست دیں۔
نادرا نے شہریوں کو مزید معلومات یا شکایات درج کرانے کے لیے ہیلپ لائن پر کال یا ویب سائٹ وزٹ کرنے کی ہدایت کی ہے۔
واضح رہے کہ نادرا پاکستانی شہریوں کو کمپیوٹرائزڈ شناختی دستاویزات فراہم کرتا ہے اور انہیں قومی شناختی کارڈ سمیت ب فارم، فیملی رجسٹریشن سرٹیفکیٹ، ازدواجی حیثیت کی تبدیلی، شناختی کارڈ کی منسوخی ودیگر سہولتیں فراہم کی جاتی ہیں۔
https://urdu.arynews.tv/nadra-expands-biker-service-in-karachi/