دنیا کے سب سے بڑے فوجی اتحاد کے سربراہ جینز اسٹولٹن برگ نے کہا کہ فن لینڈ منگل کو نیٹو میں شامل ہو جائے گا۔
فن لینڈ کے صدر کے دفتر کا کہنا ہے کہ فن لینڈ منگل کو باضابطہ طور پر نیٹو فوجی اتحاد کا رکن بن جائے گا جو کہ نیٹو کا 31 واں رکن ہوگا۔
نیٹو کے سیکرٹری جنرل جینز سٹولٹن برگ نے برسلز میں صحافیوں سے گفتگو کرتے ہوئے کہا، ’’کل ہم فن لینڈ کو 31ویں رکن کے طور پر خوش آمدید کہیں گے۔
رکن بننے کے بعد فن لینڈ کے نیٹو اتحاد میں شمولیت پر پرچم کشائی کی جائے گی۔ برسلز میں 4 اور 5 اپریل کو نیٹو ہیڈکواٹرز میں وزرائے خارجہ کا اجلاس ہو گا جس میں فن لینڈ پہلی بار شرکت کرے گا۔
گزشتہ دنوں ترک صدر اردوان نے اعلان کیا تھا کہ ترکیہ فن لینڈ کی نیٹو رکنیت کی حمایت کرے گا اور ترکیہ فن لینڈ کی نیٹو درخواست کی توثیق کرے گا۔
یہ فیصلہ ایسے وقت میں کیا گیا جب فن لینڈ کے صدر ساؤلی نینیستو اردوان سے ملاقات کے لیے انقرہ آئے تھے۔ روس کے یوکرین پر حملے کے بعد فن لینڈ اور سویڈن نے نیٹو بلاک میں شمولیت کے لیے درخواست دے رکھی ہے۔
اردوان نے نینیستو سے ملاقات کے بعد انقرہ میں ایک نیوز کانفرنس سے خطاب کرتے ہوئے کہا کہ جب سہ فریقی مفاہمت کی یادداشت میں اپنے وعدوں کو پورا کرنے کی بات آتی ہے تو ہم نے دیکھا ہے کہ فن لینڈ نے مستند اور ٹھوس اقدامات کیے ہیں۔
نیٹو کے تمام 30 ارکان نے ان کی درخواستوں کو منظور کر لیا تھا اور 28 نے ان کے الحاق کی توثیق کر دی تھی تاہم صرف ترکیہ اور ہنگری نے ابھی تک ایسا نہیں کیا تھا۔
ترکیہ نے فن لینڈ اور سوئیڈن کو ویٹو کر رکھا ہے۔ انقرہ نے نے ان دونوں ممالک کے ساتھ ایک پروٹوکول پر دستخط کیے تھے جو کہ ترکیہ کی جانب سے دہشتگرد قرار دی گئی تنظیموں کی کھلے عام حمایت نہ کرنے کا ایک وعدہ ہے۔