اسلام آباد : بھارتی وزیر نوجوت سنگھ سدھو نے کرتار پور راہداری کی افتتاحی تقریب میں شرکت کی دعوت قبول کرلی، وزیراعظم عمران خان کی خصوصی ہدایت پر فیصل جاوید نے نوجوت سدھو سے رابطہ کیا۔
تفصیلات کے مطابق کرتار پور میں دنیا کے بڑے گردوارے کے فقیدالمثال افتتاح کی تیاریاں زورو شور سے جاری ہیں، اس موقع پر حکومت پاکستان نے سرحدپار سےنوجوت سدھو کوتقریب میں مدعو کرنے کا فیصلہ کیا ہے۔
اس سلسلے میں وزیراعظم عمران خان کی خصوصی ہدایت پر فیصل جاوید نے نوجوت سدھو سے رابطہ کیا اور انہیں نو نومبر کو منعقد ہونے والی افتتاحی تقریب میں شرکت کی باضابطہ دعوت دی۔
نوجوت سنگھ سدھو نے وزیراعظم عمران خان کی دعوت پر خوشی کا اظہار کیا اور پاکستان آنے کی دعوت قبول کرلی، نوجوت سنگھ سدھو کا کہنا ہے کہ اس تاریخی تقریب میں مدعو کرنے پرعمران خان کا شکر گزار ہوں۔
انہوں نے کہا کہ دنیا بھر کےسکھ بابا گرونانک سے وابستہ مقام کی زیارت کے منتظر ہیں، کرتارپور راہداری کی تعمیر اورافتتاح نے سکھوں کو مثبت پیغام دیا ہے۔
نوجوت سدھو کا مزید کہنا تھا کہ نو نومبرکی تقریب میں شرکت کی سعادت حاصل کروں گا، حلف برداری پر محبت اور مہمان نوازی کا لطف کبھی بھلا نہ پاؤں گا، کرتار پور راہداری امن و محبت کی نئی علامت اور نئے پاکستان کا تحفہ ہے۔
اس موقع پر گفتگو کرتے ہوئے پاکستان تحریک انصاف کے رہنما سینیٹر فیصل جاوید نے کہا کہ سدھو کرتار پور منصوبے کے اہم کرداروں میں سے ایک ہیں۔
کرتار پور امن و محبت کی نئی علامت اور نئے پاکستان کا تحفہ ہے، وزیر اعظم 9 نومبر کو کرتار پور کے افتتاح سے تاریخ کا ایک نیا باب رقم کریں گے۔