شوبز انڈسٹری کی سینئر اداکارہ نازلی نصر نے دوسری شادی کرنے کی وجہ بیان کردی۔
اداکارہ نازلی نصر نے نجی میگزین کو انٹرویو دیا جس میں انہوں نے شادی اور طلاق سے متعلق اپنی رائے کا اظہار کیا۔
انہوں نے کہا کہ میرا دوسری شادی کرنے کا فیصلہ آسان نہیں تھا لیکن میں چاہتی تھی کہ بچوں پر انحصار نہ کروں اور نہ ہی انہیں کسی قسم کے دباؤ میں رکھنا چاہتی تھی، اسی لیے دوسری شادی کرنے کا فیصلہ کیا۔
اداکارہ نے کہا کہ اگر والدین طلاق کے بعد دوسری شادی نہیں کرتے تو وہ بچوں کو دباؤ میں رکھتے ہیں اور کہتے ہیں کہ زندگی بچوں کے لیے وقف کردی جو کہ سراسر غلط ہے۔
یہ پڑھیں: شوہر سے نہیں بن رہی تو زبردستی وقت نہ گزاریں، نازلی نصر
ایک سوال کے جواب میں نازلی نصر نے کہا کہ طلاق ہر دوسرے گھر کا مسئلہ ہے، مگر شوبز کی خواتین کی طلاق پر زیادہ تنقید کی جاتی ہے۔
ان کے مطابق طلاق صرف شوبز کا نہیں بلکہ ہر دوسرے گھر کا مسئلہ ہے، بس فرق اتنا ہے کہ ہماری طلاق کے بارے میں سب کو معلوم ہوجاتا ہے، جب کہ عام لوگوں کی طلاق کے بارے میں سب کو پتا نہیں چلتا۔
نازلی نصر کا کہنا تھا کہ اگر کبھی کوئی اداکارہ اپنی طلاق کے بارے میں بتاتی ہے تو اس کے پیچھے یہی مقصد ہوتا ہے کہ ہمارے تجربے سے کسی دوسرے کو مدد مل جائے، وہ کچھ سیکھ لے، ہمارا مقصد لڑکیوں کو باغی کرنا ہرگز نہیں ہوتا۔