ملک بھر میں شدید بارشوں اور سیلابی صورتحال کا الرٹ جاری

اسلام آباد: نیشنل ڈیزاسٹر مینجمنٹ اتھارٹی (این ڈی ایم اے) نے 10 جولائی 2025 تک ملک بھر میں شدید بارشوں اور سیلابی صورتحال کا الرٹ جاری کر دیا۔

جاری کیے گئے الرٹ کے مطابق پنجاب، سندھ، بلوچستان، خیبرپختونخوا، آزاد کشمیر اور گلگت بلتستان میں طغیانی کا خطرہ ہے جبکہ دریائے چناب کے مرالہ اور قادر آباد پر کم درجے کے سیلاب کا امکان ہے۔

اسی طرح دریائے کابل، سندھ، چناب، سوات، چترال و دیگر ندی نالوں کے بہاؤ میں اضافہ متوقع ہے، شمال مشرقی پنجاب، جنوبی بلوچستان اور آزاد کشمیر میں مقامی سیلاب کا خدشہ ہے۔

یہ بھی پڑھیں: خیبر پختونخوا اور گلگت بلتستان کیلیے گلوف الرٹ جاری

این ڈی ایم اے کے الرٹ کے مطابق آزاد کشمیر میں دریائے جہلم اور معاون نالوں میں اچانک طغیانی کا خطرہ ہے جبکہ گلگت بلتستان میں دریائے ہنزہ اور نالوں میں پانی کی سطح میں اضافے کا امکان ہے۔

کیرتھر رینج کے ندی نالوں، آواران، خضدار، جھل مگسی اور موسیٰ خیل میں بھی سیلابی کیفیت کا خدشہ ہے۔

این ڈی ایم اے نے شہریوں کو ہدایت کی ہے کہ تیز بہاؤ والے ندی نالوں، پلوں اور ڈوبی سڑکوں سے گزرنے سے گریز کریں، نشیبی علاقوں کے مکین قیمتی اشیاء اور مویشی محفوظ مقامات پر منتقل کریں۔

اتھارٹی نے ہدایت کی کہ حساس علاقوں کے مکین 3 سے 5 دن کی خوراک، پانی و ادویات پر مشتمل ایمرجنسی کٹ تیار رکھیں، متعلقہ ادارے فوری نکاسی آب کیلیے مشینری اور پمپس تیار رکھیں۔