پیپلز بس سروس کے نئے روٹ کے آغاز کا اعلان

کراچی: صوبائی وزیر ٹرانسپورٹ و اطلاعات شرجیل میمن نے پیپلز بس سروس کے نئے روٹ کے آغاز کا اعلان کردیا۔

اے آر وائی نیوز کے مطابق صوبائی وزیر شرجیل انعام میمن نے پیپلز بس سروس سے متعلق اجلاس کی صدارت کرتے ہوئے کہا کہ کل سے نئے روٹ پر بسیں چلائی جائیں گی۔

انہوں نے کہا کہ پیپلز بس سروس کا روٹ 5 اسٹار چورنگی سے شروع ہو کر کے ڈی اے چورنگی، ناظم آباد عید گاہ، لیاقت آباد 10 نمبر، عیسیٰ نگری، سوک سینٹر، نیشنل اسٹیڈیم، کارساز، نرسری کورنگی روڈ سے کے پی ٹی انٹرچینج اور شان چورنگی پر اختتام پذیر ہوگا۔

مزید پڑھیں: اے آر وائی نیوز کی خبر پر فوری نوٹس، پیپلز بس سروس جزوی بحال

اجلاس میں فیصلہ کیا گیا کہ بوٹ بیسن، امریکن قونصلیٹ، ماڑی پور، کیماڑی اور لیاری کے علاقوں پر مشتمل روٹ نمبر 11 کے لیے سروے کرنے کا بھی فیصلہ کیا گیا ہے۔

انہوں نے کہا کہ بی آر ٹیز اور پیپلز انٹرا ڈسٹرکٹ بس سروس پروجیکٹ مکمل ہونے کے بعد کراچی کے شہریوں کا ٹرانسپورٹ کا دیرینہ مسئلہ حل ہو جائے گا۔

شرجیل میمن نے کہا کہ پیپلزپارٹی کراچی میں پبلک ٹرانسپورٹ کے نظام کو جدید کرنے کے لیے کوشاں ہے۔