اسلام آباد: خراب کارکردگی والی بجلی کمپنیوں کے افسران کو بہتر کمپنیوں میں بھیجنے کی تجویز دے دی گئی، افسران کی روٹیشن پالیسی کا مسودہ تیار کرلیا ہے۔
تفصیلات کے مطابق خراب کارکردگی والی بجلی کمپنیوں میں بہتری لانے کی نئی حکمت عملی تیار کرلی گئی۔
ذرائع نے بتایا ہے کہ بہترکارکردگی والے ڈسکوز افسران کو خراب کارکردگی والی کمپنیوں میں تعیناتی کا پلان ہے اور خراب کارکردگی والے ڈسکوز افسران کو بہتر کمپنیوں میں بھیجنے کی تجویز دی گئی ہے۔
ذرائع کا کہنا ہے کہ ڈسکوز گریڈ 18 اور اس سے اوپر کے افسران کی روٹیشن پالیسی کا مسودہ تیار کرلیا ہے ، پاورڈویژن نے پالیسی کا مسودہ ڈسکوز بورڈ آف ڈائریکٹرز کو بھجوادیا ہے۔
ٹیسکو،کیسکو،پیسکو،سیپکواور حیسکو خراب کارکردگی والی کمپنیاں قرار دی گئی ، ان کمپنیوں کےافسران کو بہتر کارکردگی والی کمپنیوں میں لگانے کی تجویز دی ہے، اس کے علاوہ فیسکو،گیپکو،آئیسکو،لیسکو اورمیپکوبہترکارکردگی والی کمپنیاں قرار دی گئی۔
گریڈ 18 اور اوپر والے افسران کو ترقی پر دوسری ڈسکوزمیں تعیناتی کی تجویز دی ہے ، افسران کو 2 سال کیلئے دوسری بجلی تقسیم کار کمپنی میں تعیناتی کی تجویز ہے۔
ذرائع کے مطابق تعیناتی سے انکار کرنے والے افسران کو اگلے گریڈ میں ترقی نہ دینے کی بھی تجویز سامنے آئی ہے جبکہ تعیناتی سے مسلسل 2 دفعہ انکار کرنے والے افسران کو سپر سیڈ کرنے کی تجویز ہے۔