گلگت : گلگت بلتستان میں سیلاب کی تباہ کاریاں جاری ہے ، تاحال 12 افراد لاپتہ ہونے کا خدشہ ہے جبکہ سیلابی صورتحال میں اب تک 9افراد جاں بحق ہوئے ہیں۔
تفصیلات کے مطابق ترجمان گلگت بلتستان حکومت فیض اللہ فراق کی جانب سے بیان میں کہا گیا ہے کہ لاپتہ افراد کی تلاش کیلئے سرچ آپریشن جاری ہے، تاحال 12 افراد لاپتہ ہونے کا خدشہ ہے۔
فیض اللہ فراق کا کہنا تھا کہ سیلابی صورتحال میں ابتک 9 افراد جاں بحق ہوئے، جاں بحق افراد میں 2 خواتین اور 2 بچے شامل ہے۔
ترجمان نے بتایا کہ سیلاب سے 500 سے زائد مکانات، 12 کلومیٹر سے زائد سڑکیں تباہ ہوئیں، 27 پل اور 22 گاڑیاں سیلابی ریلوں کی نذرہوگئیں جبکہ دکانیں، مویشی خانے تباہ اور ہزاروں فٹ لکڑی ریلوں میں بہہ گئیں۔
مزید پڑھیں : گلگت بلتستان میں ہر طرف تباہی، 100 سے زائد مکانات منہدم
ان کا کہنا تھا کہ 300 سے زائد مسافر وں اورسیاحوں کوریسکیو کیا گیا، سب سے زیادہ جانی و مالی نقصان ضلع دیامر میں ہوا۔
دوسری جانب چیف سیکرٹری گلگت بلتستان ابرار احمد نے کہا کہ 2 ہفتوں سے موسمیاتی آفات کا سامنا کر رہے ہیں، گلیشئرز پگھلے اور بارشوں سے نقصان دگنا ہوگیا، 10 جون سے اب تک 9 افراد جاں بحق ہوئے۔
ابرار احمد کا کہنا تھا کہ دیامر کی وادی تھک اور تھور میں 8 اموات ہوئیں، وادی استور میں ایک شخص جاں بحق ہوا ، زیادہ حادثات کلاؤڈ برسٹ کی وجہ سے ہوئی۔