پرمٹ کے بغیر حج نہیں، نائب گورنر مکہ

مکہ کے نائب گورنر اور مرکزی حج کمیٹی کے نائب سربراہ شہزادہ سعود بن مشعل نے کہا ہے کہ پرمٹ کے بغیر حج نہیں ہو سکے گا۔

سبق نیوز کے مطابق گورنر مکہ اور مرکزی حج کمیٹی کے سربراہ اعلیٰ شہزادہ خالد الفیصل کی نمائندگی کرتے ہوئے نائب گورنر اور مرکزی حج کمیٹی کے نائب سربراہ شہزادہ سعود بن مشعل نے کہا ہے کہ پرمٹ کے بغیر حج نہیں، حج کے لیے پرمٹ کا ہونا بنیادی شرط ہے جب کہ قوانین کی خلاف ورزی کرنے والوں سے سختی سے نمٹا جائے گا۔

گورنریٹ میں پریس کانفرنس سے خطاب کرتے ہوئے ان کا کہنا تھا کہ ’حج عبادت اور مہذب طرز عمل کے عنوان سے مہم شروع کرنے کا مقصد غیر قانونی طور پر حج کا ارادہ کرنے والوں کو ماضی کے حوالے سے بھی خبردار کرنا ہے، ساتھ ہی غیر قانونی عازمین کو روک کر قانونی طور پر حج کرنے والوں کو ممکنہ تمام سہولتوں کی فراہمی کو یقینی بنانا ہے۔

نائب گورنر نے کہا کہ یہ واضح ہے کہ پرمٹ کے بغیر حج نہیں ہوگا اور جو بھی اس کی خلاف ورزی کرے گا اس سے سختی سے نمٹیں گے۔ ماضی میں بھی پرمٹ کے بغیر حج کے لیے جانے والوں کے خلاف قانونی چارہ جوئی کے بہترین نتائج برآمد ہوئے تھے۔

https://urdu.arynews.tv/a-female-pilgrim-died-while-traveling-on-hajj/

اس موقع پر ادارہ امن عامہ کے ڈائریکٹر جنرل بریگیڈیئر محمد البسامی نے بتایا کہ وزارت حج وعمرہ کے تعاون سے مکہ مکرمہ میں عازمین کی رہائشی عمارتوں کا سروے کیا جا رہا ہے تاکہ غیر قانونی حج کے ارادے سے وہاں بیٹھے افراد کو نکالا جا سکے۔