دولت کمانا ہر شخص کی خواہش ہے لیکن اس کے لیے محنت درکار ہوتی ہے تاہم دنیا میں ایک شخص ایسا بھی ہے جو بغیر کچھ کیے گھر بیٹھے سالانہ ایک ارب ڈالر کمائے گا۔
غیر ملکی میڈیا کے مطابق یہ خوش نصیب شخصیت کوئی اور نہیں بلکہ امریکی ٹیکنالوجی کمپنی مائیکرو سافٹ کے سابق سی ای او اسٹیو بالمر ہیں جو پہلے ہی دنیا کی امیر ترین شخصیات میں شامل ہیں تاہم اب وہ بغیر کچھ کیے گھر بیٹھے سالانہ ایک ارب ڈالر (پاکستانی پونے تین کھرب روپے سے زائد) کمائیں گے۔
رپورٹ کے مطابق مائیکرو سافٹ کمپنی کی جانب سے سابق سی ای او کو یہ خطیر رقم سالانہ بنیادوں پر فراہم کی جائے گی۔
اسٹیو بالمر جو 1980 میں اس کمپنی کا حصہ بنے تھے اور کمپنی کے 30 ویں ملازم تھے۔ وہ بل گیٹس کے بعد جنوری 2000 میں کمپنی کے سی ای او بنے تھے اور فروری 2014 میں اس عہدے سے سبکدوش ہوئے اور کمپنی سے وقت رخصت ان کے پاس مائیکرو سافٹ کے 33 کروڑ 32 لاکھ شیئرز تھے۔
مائیکرو سافٹ نے فیصلہ کیا ہے کہ وہ اپنے سہ ماہی ڈویڈنڈ کو 75 فیصد تک بڑھا رہی ہے اور سالانہ فی شیئر پر 3 ڈالر تک ادا کرے گی۔ اس طرح اسٹیو بالمر جو پہلے ہی شیئرز کی ایک بھاری تعداد کے مالک ہیں اب سالانہ ایک ارب ڈالر ڈیوڈنڈ کے طور پر حاصل کریں گے۔