عمان میں متعارف کرائی گئی شفا ایپ مریضوں اور ڈاکٹروں کے مابین طبی معلومات سے متعلق رابطے کی ایپ ہے جس پر اب تک ایک لاکھ 72 ہزار سے زائد ملکی وغیر ملکی افراد رجسٹرڈ ہوچکے ہیں۔
عمانی وزارت صحت کے اعلان کیا ہے کہ دو سال قبل 2021 میں شفا ایپ کے آغاز سے اب تک ایک لاکھ 72 ہزار 279 ملکی اور غیر ملکی افراد نے اس ایپ پر رجسٹریشن کرائی ہے۔ ایپ کو ملنے والا بے مثال ردعمل سلطنت میں ڈیجیٹل تبدیلی کے میدان میں ایک کوانٹم لیپ ہے۔
ڈائریکٹوریٹ جنرل آف انفارمیشن ٹیکنالوجی میں الیکٹرانک ہیلتھ ڈپارٹمنٹ کے ڈائریکٹر وسام محمد ابو دراز نے بتایا کہ شفا ایپ ایک خاص پلیٹ فارم ہے جو مریضوں اور ڈاکٹروں کے درمیان طبی معلومات کو اکٹھا کرنے اور ان کا تبادلہ کرنے میں معاون ہے۔
اس کے ساتھ رجسٹرڈ شہریوں اور غیر ملکی رہائشیوں کے میڈیکل ریکارڈ فراہم کرتی ہے اور ضرورت پڑنے پر صحت کے ادارے ریکارڈ تک رسائی حاصل کر سکتے ہیں۔
انہوں نے وضاحت کی کہ ایپ 16 سروسز اور خصوصیات بشمول میڈیکل ریکارڈ اور تاریخ، فیملی میڈیکل ہسٹری، اپائنٹمنٹ بکنگ، ادویات، طبی معائنے، امیونائزیشن اسٹیٹس، طریقہ کار کی رپورٹس، اہم علامات، اعضا کا عطیہ، خون کا عطیہ اور ورچوئل کلینک وغیرہ دکھاتی ہے جن سے ملک میں موجود کوئی بھی صارف فائدہ اٹھا سکتا ہے۔ اس کے علاوہ یہ ہیلتھ سروسز فراہم کرنے والوں کے ساتھ مشاورت سے متعلق معلومات کا تبادلہ کرنے کا ایک پلیٹ فارم بھی ہے۔
ابو دراز نے اس حوالے سے مزید بتایا کہ اس ایپلی کیشن کے سائیڈ مینو میں ایک ‘What’s New’ نامی فیچر بھی ہے جو ہر سروس کو استعمال کرنے کا طریقہ کار بتاتا ہے۔
ان کا کہنا تھا کہ اس ایپ میں کچھ خدمات کو مزید اپڈیٹ کیا جائے گا جیسا کہ بشمول ڈاکٹر کے ساتھ چیٹ فیچر جس میں تصاویر اور آڈیو کلپس شیئر کرنے کے اختیارات شامل ہیں۔ اسکے علاوہ سیلف رجسٹریشن، الیکٹرانک ادائیگی، ایک جامع رپورٹ کی درخواست، خون کے عطیہ کے لیے اپوائنٹمنٹ کی بکنگ، اور ایپ کو استعمال کرنے کے لیے سپورٹ اور مدد بھی شامل کی جائے گی۔
ابو دراز کے مطابق رائل اسپتال اور خولہ اسپتال میں ایک ورچوئل کلینک سروس فعال کر دیا گیا ہے جب کہ جلد یہ سروس دوسرے اسپتالوں میں بھی استعمال کی جائے گی۔
اسی طرح وزارت نے مختلف گورنریٹس میں پانچ صحت مراکز میں اپائٹمنٹس کی بکنگ کے لیے ایک سروس کو بھی فعال کر دیا ہے جب کہ ڈائریکٹوریٹ کے تیار کردہ پلان کے مطابق باقی مراکز صحت میں بھی یہ سروس جلد فراہم کردی جائے گی۔