پاکستان کی شکست پر بالی وڈ کے اداکار ایوشمان کھرانہ بھی افسردہ ہوگئے، امپائر کے آؤٹ نہ دینے پر دل کی بھڑاس سوشل میڈیا پر نکال دی۔
پاکستان کو جنوبی افریقا کے ہاتھوں سنسنی خیز مقابلے میں ایک وکٹ سے شکست کا سامنا کرنا پڑا تھا۔ پروٹیز نے گرتے پڑتے 271 رنز کا ہدف 9 وکٹوں کے نقصان پر پورا کیا۔ تاہم میچ کے آخری لمحات میں حارث رؤف کی پروٹیز بیٹر کےخلاف زور دار اپیل کو امپائر نے مسترد کردیا تھا۔
میچ کے دوران ہی ایوشمان کھرانہ اپنے جذبات پر قابو نہ رکھ سکے اور جنوبی افریقی بیٹر تبریز شمسی کو آؤٹ نہ دینے پر سوشل میڈیا سائٹ ایکس پر لکھا کہ ’بھائی یہ شمسی آؤٹ تھا‘۔
Yeh Shamsi out tha bro..
— Ayushmann Khurrana (@ayushmannk) October 27, 2023
واضح رہے کہ جنوبی افریقا کو جیت کے لیے 8 رنز اور پاکستان کو کامیابی کے لیے صرف ایک وکٹ درکار تھی۔ ایسے میں حارث رؤف نے جنوبی افریقا کے ٹیل اینڈر بیٹر تبریز شمسی کوگیند کروائی جو ان کے پیڈ پر لگی۔
پاکستانی ٹیم نے اس پر ایل بی ڈبلیو کی اپیل کی لیکن آن فیلڈ امپائر نے ناٹ آؤٹ دیا، تاہم گرین شرٹس نے ری ویو لینے کا فیصلہ کیا مگر تھرڈ امپائر نے فیلڈ امپائر کے فیصلے کو برقرار رکھا۔
ری ویو میں نظر آیا کہ حارث کی گیند وکٹ کو معمولی چھو رہی ہے لیکن آن فیلڈ امپائر کی جانب سے ناٹ آؤٹ دیا گیا تھا اس لیے وہ امپائرز کال کی وجہ سے ری ویو کے بعد بھی ناٹ آؤٹ ہی رہا۔
اس میچ میں جنوبی افریقہ سے ہارنے کے بعد پاکستانی ٹیم کے لیے سیمی فائنل میں رسائی نہایت مشکل ہوگئی ہے اور ہمیشہ کی طرح پاکستان کو اب دوسری ٹیموں کی کارکردگی پر بھی انحصار کرنا پڑے گا۔