بیجنگ : چین میں ایف اے ٹی ایف ذیلی گروپ کا اے پی جی اجلا س کل سے شروع ہوگا، اجلاس میں شرکت کے لئے پاکستانی وفد چین روانہ ہوگیا ہے ، وفد اینٹی منی لانڈرنگ، ٹیررفنانسنگ پر اقدامات سےآگاہ کرے گا جبکہ چین کی جانب سےبھارتی پروپیگنڈےکی مخالفت کیے جانے کاامکان ہے۔
تفصیلات کے مطابق فنانشل ایکشن ٹاسک فورس (ایف اے ٹی ایف) ذیلی گروپ کا اے پی جی اجلا س کل سے شروع ہورہا ہے، چین کے شہر گوانگ میں ہونے والا اجلاس دو دن جاری رہےگا۔
چین میں ہونے والے اجلاس میں پاکستانی ٹیم بھی شرکت کرے گی اور پاکستانی وفد اینٹی منی لانڈرنگ،ٹیرر فنانسنگ پر اقدامات سےآگاہ کرے اور اقدامات کے نتیجے میں ہونے والی پیشرفت سے بھی آگاہ کیا جائے گا۔
اجلاس میں شرکت کے لئے پاکستانی وفد چین روانہ ہوگیا ہے، پاکستانی وفد کی قیادت وفاقی سیکرٹری خزانہ یونس ڈھاگا کریں گے جس میں فنانشل مانٹرنگ یونٹ، ایف آئی اے، محکمہ کسٹمز، سیکورٹی اینڈ ایکس چینج کمیشن آف پاکستان ،وزارت خزانہ اور وزارت داخلہ کے افسر شامل ہوں گے۔
چین کی جانب سےبھارتی پروپیگنڈےکی مخالفت کیے جانے کاامکان ہے۔
مزید پڑھیں : ایف اے ٹی ایف مذاکرات: پاکستان نے 27 نکاتی ایکشن پلان پرجواب تیارکرلیا
دوسری جانب ذرائع کے مطابق پاکستان نے ایف اے ٹی ایف کی جانب سے دیے گئے 27 نکاتی ایکشن پلان پر اپنا جواب تیار کرلیا ہے، پاکستان اس بارے میں ادارے کو اب تک کئے جانے والے اقدامات سے آگاہ کرے گا۔
ذرائع نے دعویٰ کیا کہ ایف اے ٹی ایف سے ملاقات میں ایشیا پیسفک گروپ کا وفد بھی موجود ہوگا، پاکستان ایف اے ٹی ایف کو منی لانڈرنگ کی روک تھام کےلئے قائم نئے ڈائریکٹوریٹ کے بارے میں بھی بریفنگ دےگا، جسے ڈائیریکٹوریٹ آف کراس بارڈر کرنسی موومنٹ کانام دیا گیا ہے۔
یاد رہے کہ28 مارچ کو اسلام آباد میں ایف اے ٹی ایف کے ایشیا پیسفک گروپ کے درمیان مذاکرات ہوئے تھے، جس میں وفد نے منی لانڈرنگ روکنے کیلئے اقدامات جاری رکھنے پر زور دیا تھا، وفد نے دہشت گردوں کی مالی معاونت روکنے اور کالعدم تنظیموں کے خلاف اقدامات جاری رکھنے کا مطالبہ کیا تھا۔
وفد نے منی لانڈرنگ روکنے کیلئے اب تک کی پیش رفت پر اطمینان کا اظہار کیا تھا۔