’سیلاب کو قدرتی آفت کہنا غلط ہے یہ سب ہماری کوتاہیاں ہیں‘

وزیر دفاع خواجہ آصف نے کہا ہے کہ یہ کہنا کہ سیلاب قدرتی آفت ہے غلط ہے یہ سب ہماری اپنی کوتاہیاں ہیں۔

قومی اسمبلی اجلاس میں اظہار خیار کرتے ہوئے خواجہ آصف نے بلدیاتی نظام میں خامیوں کی نشاندہی کرتے ہوئے کہا کہ بدقسمتی میں ہمارے ملک میں بلدیاتی انتخابات کی تاریخ تو دور قانون کا بھی پتہ نہیں ہوتا، سیاسی مفادات ایک طرف رکھ کرہمیں بلدیاتی اداروں کومضبوط کرنا چاہیے صوبوں میں اختیارات صوبائی دارالحکومتوں تک ہی محدود ہیں۔

انہوں نے کہا کہ ہمارے ملک میں بلدیاتی ادارے تباہ ہیں پنجاب میں تو ہے ہی نہیں، بلدیاتی قانون میں ترمیم کاتوسب کریڈٹ لیتےہیں اچھی بات ہے اختیارات اور طاقت کی تقسیم کریں اس سےگاؤں دیہات میں عوام کو فائدہ ہو گا لیکن بدقسمتی سے ہم بلدیاتی اداروں کو سیاسی ٹول کےطور پر استعمال کرتے ہیں۔

خواجہ آصف نے چھوٹی ڈیمز کی ضرورت پر زور دیتے ہوئے کہا کہ ہمیں پہلے چھوٹے ڈیمز پر فوری توجہ دینی چاہیے بڑے ڈیمز بھی بنانا ہوں گے، گاؤں کی سطح پر بھی چھوٹے ڈیمز بن جاتے ہیں تو اچھی بات ہے کیونکہ سیلاب جیسی صورتحال کا اب ہمیں ہر سال سامنا کرنے پڑے گا، پانی کہیں کھڑا نہیں ہوتا وہ فوری اپنا راستہ تبدیل کر لیتا ہے ہم کتنے بند باندھیں گے فوری طور پر ڈیمز بنانے پر توجہ دینا چاہیے۔