حکومت نے قومی ٹیم کی سیکیورٹی کا معاملہ آئی سی سی کے سامنے اٹھانے کا فیصلہ کیا ہے۔
تفصیلات کے مطابق قومی ٹیم کی کرکٹ ورلڈکپ میں شرکت کے حوالے سے وزیر خارجہ بلاول بھٹو کی زیرصدارت اہم اجلاس ہوا جس میں قمر زمان کائرہ، احسان مزاری، چیئرمین پی سی بی مینجمنٹ کمیٹی ذکا اشرف سمیت قومی سلامتی کے اداروں کے حکام نے شرکت کی۔
اجلاس میں فیصلہ کیا گیا کہ قومی کرکٹ ٹیم کی بھارت میں سیکیورٹی پر کوئی سمجھوتہ نہیں کیا جائے گا۔ سیکیورٹی گارنٹی ملنے پرقومی کرکٹ ٹیم بھارت جائے گی اس حوالے سے پاکستان کرکٹ بورڈ معاملے کو آئی سی سی کے ساتھ اٹھائے گا۔
ذرائع کا کہنا ہے کہ ذکا اشرف حکومت کے تحفظات سے آئی سی سی کو آگاہ کریں گے۔