قومی ٹیم امریکا سے ورلڈ کپ جیت کر لوٹے گی، چیئرمین پی سی بی

چیئرمین پی سی بی محسن نقوی نے کہا ہے کہ ٹیم کو اس وقت قوم کی سپورٹ کی ضرورت ہے اور گرین شرٹس امریکا سے ورلڈ کپ جیت کر لوٹیں گے۔

پاکستان کرکٹ ٹیم جو انگلینڈ سے چار ٹی ٹوئنٹی میچوں پر مشتمل سیریز کا آخری میچ کھیلنے کے لیے لندن پہنچ چکی ہے۔ ٹیم کے اعزاز میں پاکستانی ہائی کمشنر کی جانب سے پاکستان ہاؤس برطانیہ میں تقریب کا اہتمام کیا گیا۔

تقریب کے مہمان خصوصی چیئرمین پی سی بی محسن نقوی تھے جب کہ میئر لندن صادق خان اور پاکستان میں برطانیہ کے ہائی کمشنر جین میریٹ کے علاوہ سابق نگراں وزیراعظم انوار الحق کاکڑ، وزیراعلیٰ بلوچستان سرفراز بگٹی اور برطانیہ میں مقیم پاکستانیوں کی بڑی تعداد نے شرکت کی۔

تقریب سے خطاب کرتے ہوئے چیئرمین پی سی بی نے کہا کہ قومی ٹیم کے کھلاڑی پُر اعتماد ہیں اور ورلڈ کپ میں یقیناً اچھا پُرفارم کریں گے۔ اس وقت ٹیم کو قوم کی سپورٹ کی ضرورت ہے، اپنے کھلاڑیوں پر بھروسہ رکھیں وہ اچھا کھیلیں گے اور ورلڈ کپ جیتیں گے۔

محسن نقوی نے کہا کہ ہر پاکستانی نے اس وقت کرکٹرز کو یہ بتانا ہے کہ ہار جیت سے قطع نظر وہ ٹیم کے ساتھ ہیں۔ اس اپروچ کے ساتھ کھلاڑی یقیناً امریکا سے ٹرافی ساتھ لے کر لوٹیں گے۔

تقریب سے میئر لندن صادق خان اور برطانیہ میں پاکستانی ہائی کمشنر نے بھی خطاب کیا۔

 پاکستان نے 2009 میں ٹی ٹوئنٹی ورلڈ کپ یونس خان کی قیادت میں جیتا تھا۔

واضح رہے کہ ٹی 20 ورلڈ کپ 2024 کا آغاز یکم جون سے امریکا اور ویسٹ انڈیز میں مشترکہ میزبانی میں ہو رہا ہے۔ پاکستان ٹی 20 ورلڈ کپ میں اپنے سفر کا آغاز 6 جون کو امریکا کے خلاف میچ سے کرے گا جب کہ 9 جون کو نیویارک میں پاک بھارت ٹاکرا ہوگا۔