اسلام آباد: پاکستان نے 126 ممالک کے شہریوں کو بغیر فیس ویزا جاری کرنے کا اعلان کردیا۔
اے آر وائی نیوز کے مطابق وفاقی وزیر اطلاعات عطا تارڑ نے نیوز کانفرنس کرتے ہوئے کہا کہ آج رات 12 بجے پاکستان کی ویزا پالیسی جاری ہورہی ہے، 126 ممالک کے شہریوں کو بغیر فیس پاکستان ویزا جاری کیا جائے گا۔
انہوں نے کہا کہ 126 ممالک کے لیے ویزا فیس ختم کردی گئی ہے اور انہیں 3 ماہ کا ویزا جاری کیا جائے گا، سادہ فارم مکمل کرنے کے بعد لوگوں کو ویزا مل جائے گا۔
وفاقی وزیر نے کہا کہ ہمارا ملک خوبصورت ہے چاہتے ہیں کہ بیرون ملک سے سیاح یہاں آئیں، اللہ تعالیٰ نے ہمارے ملک کو ہر نعمت سے نوازا ہے، خلیجی ممالک کے رہائشی صرف پاسپورٹ لے کر پاکستان آئیں گے تو فوری ویزا ملے گا۔
عطا تارڑ نے کہا کہ وزیراعظم شہباز شریف کی ہدایت پر کل ڈرون شو کرنے جارہے ہیں، 500 ڈرون پاکستان پہنچ چکے ہیں کل رات ایف نائن پارک میں نظر آئیں گے۔
انہوں نے کہا کہ ملک بھر میں یوم آزادی کے حوالے سے شاندار تقریبات کا انعقاد کیا جا رہا ہے، وزیراعظم کی ہدایت پر ایف نائن پارک میں جشن آزادی کا بڑا ایونٹ ہوگا۔
وزیر اطلاعات نے کہا کہ یہ غیر سیاسی تقریب ہے، صرف پاکستان کا پرچم ہوگا، سیاحوں کی پاکستان آمد سے متعلق سیکورٹی اداروں کو آگاہ کیا جائے گا۔