اسلام آباد : وزیرمملکت خزانہ عائشہ غوث کا کہنا ہے کہ پاکستان دیوالیہ ہوا نہ ہوگا، پاکستان نےتمام وعدوں کو پورا کیا،آئندہ بھی کرتا رہے گا۔
وزیر برائے مملکت خزانہ ڈاکٹر عائشہ غوث پاشا نے میڈیا سے گفتگو کرتے ہوئے کہا کہ پاکستان نے ڈیفالٹ کیا نہ کرے گا، پاکستانی عوام دیوالیہ ہونے کے پروپیگنڈا پر کان نہ دھریں۔
وزیر مملکت برائے خزانہ کا کہنا تھا کہ پاکستان اپنی تمام بین الاقوامی ذمہ داریاں پوری کرے گا، پاکستان نے اب تک کوئی ایسی ذمہ داری نہیں جو پوری نہ کی ہو۔
عائشہ غوث پاشا نے کہا کہ آئی ایم ایف سے بات چیت حتمی مراحل میں ہے، آئی ایم ایف کے ساتھ بات چیت مثبت انداز میں مکمل ہو جائے گی۔
ان کا کہنا تھا کہ پاکستان نے آئی ایم ایف کے کہنے پر تمام پیشگی اقدامات کر لیے ہیں،پارلیمنٹ نے 170 ارب روپے کا منی بجٹ پاس کر لیا ہے اور منی بجٹ کےنوٹیفکیشن بھی جاری کر دیئے گئے ہیں۔
وزیر مملکت نے بتایا کہ امیر طبقے کو حاصل سبسڈیز ختم کی جارہی ہیں، زیادہ بجلی،گیس استعمال کرنے والوں کیلئے ٹیرف بڑھایا گیا ہے، بجلی اور گیس کی سبسڈی صرف غریب طبقات کیلئے ہوگی۔
ان کا کہنا تھا کہ ملکی معاشی مشکلات کی ایک وجہ بین الاقوامی حالات بھی ہیں، پاکستان کے پاس معاشی مسائل سے نکلنے کی حکمت عملی ہے، پاکستان میں بہت جلد معاشی استحکام بحال ہو جائے گا۔