پاکستان سے تعلق رکھنے والے موسیقار طلال قریشی نیویارک کے ٹائمز اسکوائر پر جلوہ گر ہوگئے، ان کے نئے البم ’ٹربو‘ کو اسپاٹی فائی کی جانب سے لانچ کیا جارہا ہے۔
تفصیلات کے مطابق عالمی میوزک اسٹریمنگ سروس اسپاٹی فائی طلال قریشی کے نئے البم ’ٹربو‘ کو لانچ کرنے جارہی ہے جس کے بعد طلال پاکستان کے پہلے فنکار ہوں گے جنھیں یہ اعزاز حاصل ہوگا۔
کلاسیکی پاکستانی موسیقی اور جدید الیکٹرانک طرز کے امتزاج کے لیے مشہور، طلال نے اسپاٹی فائی کا تعاون حاصل کرنے کا شاندار کارنامہ انجام دیا ہے، جس کی وجہ سے ان کی آواز دنیا بھر کے سامعین تک پہنچی ہے۔
میوزک پروڈیوسر کی نئی البم 6 اکتوبر کو ریلیز ہوئی ہے اور اس کیلئے اسپاٹی فائی ایک ہفتے تک تشہیری مہم چلائے گی۔
’ٹربو‘ میں طلال قریشی نے مشرق اور مغرب کی موسیقی کو جدید آلات کے ساتھ پیش کیا ہے جبکہ اس میں ثقافتی دوریوں کو بھی کم کرنے کی کوشش کی گئی ہے۔
اس نئے البم کو بنانے کے لیے میوزک پروڈیوسر کے ساتھ مختلف فنکاروں زاؤ علی، ظہور، بلال بلوچ، نتاشہ نورانی اور مانو نے بھی اپنا حصہ ڈالا ہے۔
اس سے قبل بھی کئی پاکستانی موسیقار بگ ایپل کے اس مرکزی مقام کی زینت بن چکے ہیں۔ ان میں لیجنڈری گلوکارہ صنم ماروی، ٹینا ثانی، نازیہ حسن، حدیقہ کیانی، آئمہ بیگ، نتاشا نورانی، حمیرا اعجاز، مومنہ مستحسن اور حسن شامل ہیں۔