پیرس میں جاری پیرالمپک گیمز میں ایرانی کھلاڑی سارہ جوانمردی نے اپنے نام کی طرح جواں مردی کا مظاہرہ کرتے ہوئے ایران کے لیے پہلا گولڈ میڈل جیت لیا۔
پیرس میں حالیہ اولمپکس گیمز کے بعد اب پیرالمپکس جاری ہیں جس میں 150 سے زائد ممالک کے ہزاروں ایتھلیٹ شریک ہیں جن کے سامنے ایران کی خاتون ایتھلیٹ سارہ جوانمردی نے اپنے نام کی طرح جواں مردی کا مظاہرہ کرتے ہوئے اپنے ملک کے لیے پہلا گولڈ میڈل جیت لیا۔
غیر ملکی میڈیا کے مطابق سارہ نے خواتین کے 10 میٹر پی ٹو شوٹنگ مقابلے کے فائنل میں ترکیہ کی کھلاڑی آئسل اوزجان کو کانٹے کے مقابلے کے بعد ہرا دیا۔
مقابلے کے آغاز پر ترکیہ کی کھلاڑی، ایرانی ایتھلیٹ پر حاوی رہیں لیکن آخری فیصلہ کن راؤنڈ میں سارہ نے 236.8 پوائنٹس کے ساتھ آئسل کو ہرا کر چیمپئن بننے کا اعزاز حاصل کیا۔۔
ایرانی شوٹر نے طلائی تمغہ اپنے نام کر کے پیرالمپک میڈل دوڑ میں ایران کے لیے پہلا گولڈ میڈل جیت لیا۔
اس مقابلے میں ترکش کھلاڑی اوزجان نے چاندی جبکہ بھارت کی روبینہ فرانسس نے تیسری پوزیشن حاصل کر کے کانسی کا تمغہ اپنے نام کیا۔