فرانس میں تین سال قبل چوری ہونے والا طوطا حیران کن طور پر پولیس کو نام بتا کر مالک کے پاس پہنچ گیا۔
غیرملکی خبررساں ادارے کی رپورٹ کے مطابق مغربی افریقی سرمئی طوطا جسے تین سال قبل فرانس میں چوری کرلیا گیا تھا پولیس کو اپنا نام بتا کر مالک کے پاس واپس پہنچ گیا۔
گزشتہ ہفتے ایک دکاندار فرانسیسی شہر مارسیلز کے اولڈ پورٹ کے قریب طوطے کو فروخت کرنے کی کوشش کررہا تھا جب پولیس نے اسے دیکھ لیا۔
جب پولیس نے پرندے کا معائنہ کیا جس کی کوئی شناختی انگوٹھی نہیں تھی تو طوطے نے ’جیکو، جیکو‘ کہنا شروع کردیا، یہ نام فرانس میں طوطوں کے لیے روایتی ہے۔
پولیس افسر کو یاد آیا کہ شہری نے 2020 میں اس نام کے اپنے افریقی سرمئی طوطے کی گمشدی کی اطلاع دی تھی اور مالک نے پولیس کو بتایا تھا کہ طوطے کی نشانی یہ ہے کہ وہ اپنا نام خود بتائے گا جو کہ ’جیکو‘ ہے۔
بعدازاں مالک کو طوطا ملنے کی اطلاع دی گئی جس کے بعد شہری ایک خیراتی جانوروں کی پناہ گاہ میں گمشدہ طوطے سے ملنے گیا اور پرندے نے اپنے مالک کو دیکھتے ہی اپنا نام پکارنا شروع کردیا۔
واضح رہے کہ افریقی سرمئی طوطا اپنی گفتگو کی صلاحیتوں اور ملنسار فطرت کے لیے مشہور ہے، یہ انتہائی قیمتی ایویئن نسل ہے جس کی قیمت تقریباً دو لاکھ روپے ہے۔
افریقی سرمئی طوطے کی اس قابل قدر قیمت نے بدقسمتی سے اسے چوری اور غیرقانونی فروخت کا ایک ہدف بنادیا ہے۔