پاکستان کرکٹ بورڈ (پی سی بی) کا رواں مالی سال 26-2025 کے لیے 18 ارب 30 کروڑ کے بجٹ تخمینہ کی متفقہ طور پر منظوری دے دی گئی ہے۔
اے آر وائی نیوز کے مطابق پی سی بی کے بورڈ آف گورنرز کا اجلاس چیئرمین محسن نقوی کی زیر صدارت نیشنل کرکٹ اکیڈمی میں ہوا۔ جس میں چیف فنانشل آفیسر جاوید مرتضیٰ نے بجٹ کے اہم خدوخال پربریفنگ دی اور شرکا کے سامنے 18 ارب 30 کروڑ بجٹ کا تخمینہ پیش کیا جس کی متفقہ طور پر منظوری دے دی گئی۔
اجلاس میں گزرے مالی سال کے بجٹ استعمال پر اطمینان کا اظہار کرتے ہوئے گزشتہ بورڈ میٹنگ کے فیصلوں کی توثیق بھی کی گئی۔
اس موقع پر کرکٹ کے فروغ کے لیے کئی اہم فیصلے بھی کیے گئے۔ ریجنل کرکٹ کی ترقی کے لیے بہترین کارکردگی دکھانے والے ریجن کی ہر سال حوصلہ افزائی کا فیصلہ کرتے ہوئے بہترین پرفارمنس دینے والے ریجن کو انعام دینے کا اعلان کیا گیا۔
اجلاس میں پی سی بی اسٹاف کی پرفارمنس کو بھی باقاعدہ مانیٹر کرنے کا فیصلہ کیا گیا۔
بورڈ آف گورنرز کے ممبران ظہیر عباس، سجاد علی کھوکھر، ظفر اللہ، طارق سرور، چیف آپریٹنگ آفیسر پی سی بی سمیر احمد، چیف ایگزیکٹو آفیسر پی ایس ایل سلمان نصیر، ڈائریکٹر میڈیا اینڈ کمیونیکیشن عامر میر، ڈائریکٹر ڈومیسٹک کرکٹ عبداللہ خرم نیازی، ہیڈ ویمنز کرکٹ رافعہ نے اجلاس میں براہ راست شرکت کی جب کہ انوار غنی، مصطفیٰ رمدے، دانیال گیلانی، انوار احمد خان، ڈاکٹر شفیع الرحمان اور ڈائریکٹر انٹرنیشنل کرکٹ عثمان واہلہ نے ویڈیو لنک کے ذریعہ اجلاس میں شرکت کی۔
https://urdu.arynews.tv/psl-10-season-superhit-viewer-ship-breaks-reocords/