اسلام آباد: وزیر خارجہ اور چیئرمین پاکستان پیپلز پارٹی بلاول بھٹو زرداری سے راولپنڈی، اٹک، سیالکوٹ، خوشاب، جہلم اور جنوبی پنجاب سے تعلق رکھنے والی شخصیات نے ملاقاتیں کیں اور پارٹی میں شمولیت کا اعلان کیا۔
زرداری ہاﺅس اسلام آباد میں بلاول بھٹو زرداری نے وفود سے گفتگو کرتے ہوئے کہا کہ اپنے علاقوں میں پارٹی کو مضبوط کرنے کیلیے کردار ادا کریں، ہم عام انتخابات میں بھرپور تیاری کے ساتھ میدان میں اتریں گے۔
بلاول بھٹو زرداری نے کہا کہ ہمارے پاس ذوالفقار علی بھٹو اور بینظیر بھٹو کا منشور ہے، روٹی، کپڑا اور مکان ہمارا منشور ہے، پیپلز پارٹی ملک سے غربت ختم کر کے عوام میں خوشحالی لائے گی۔
مختلف شخصیات سے ملاقاتوں کے دوران پیپلز پارٹی وسطی پنجاب کے جنرل سیکریٹری سید حسن مرتضیٰ، وزیر مملکت اور پیپلز پارٹی راولپنڈی ڈویژن کے صدر سردار سلیم حیدر اور ندیم افضل چن موجود تھے۔
ملاقات کے دوران پیر عباس محی الدین نے پیپلز پارٹی کی مکمل حمایت کا اعلان کیا۔ ملاقات کے دوران ملک ریاست علی، ذیلدار احسن شاہ، سید ظہیر شاہ، رفعت حیات خان، ملک عاقل علی خان، انس عزیز اور خواجہ خان نے پیپلز پارٹی کی حمایت کا اعلان کیا۔ ان رہنماﺅں نے کچھ دن قبل پارٹی میں شمولیت اختیار کی تھی۔
ڈسکہ سیالکوٹ سے سابق ایم پی اے اور سابق تحصیل ناظم اعجاز احمد چھجا نے بھی پیپلز پارٹی میں شمولیت کی۔ جہلم سے پی پی 25 کے سابق امیدوار راجہ سفیر نے بھی پارٹی میں شمولیت کا اعلان کیا۔
جہلم سے تعلق رکھنے والے سابق ایم پی اے ملک جاوید نے مسلم لیگ (ن) چھوڑ کر پیپلز پارٹی میں شمولیت اختیار کی۔ جہلم سے قومی اسمبلی سے سابق امیدوار نذر اقبال نے بھی پیپلز پارٹی میں شمولیت اختیار کی۔ پی پی 82 خوشاب سے سابق امیدوار ملک ذیشان اعوان سابق ایم پی چوہدری شوکت نے بھی شمولیت اختیار کی۔
بلاول بھٹو زرداری سے ملاقات کرنے والوں میں راجہ عمار سردار، پیر عاقب علی، رفعت حیات خان، پیر عباس محی الدین، ملک طاہر اختر، اعجاز احمد، ملک سعید عباس اور عابد شامل تھے۔ وزیر مملکت اور پیپلز پارٹی جنوبی پنجاب کے سیکریٹری جنرل نوابزادہ افتخاراحمد اور ایم ڈی بیت المال عامر فدا پراچہ نے بھی ملاقات کی۔