لاہور: سابق وزیر اعلیٰ پنجاب پرویز الٰہی کا کہنا ہے کہ پاک افواج کو سلام پیش کرتا ہوں، قوم پاک فوج کے ساتھ مل کر لڑی۔
منی لانڈرنگ کیس کی سماعت کے بعد عدالت کے باہر میڈیا سے گفتگو میں پرویز الٰہی نے کہا کہ بھارت دوبارہ حملے کی جرات نہیں کرے گا اور اگر کیا تو مار کھائے گا۔
پاک بھارت کشیدگی سے متعلق تمام خبریں
پرویز الٰہی سمیت دیگر کے خلاف منی لانڈرنگ کیس کی سماعت کے دوران پراسیکیوٹر نے عدالت کو بتایا کہ ہم ہر ماہ انٹرپول کو مونس الٰہی کی گرفتاری کیلیے ریڈوارنٹ کیلیے درخواست بھجواتے ہیں، جیسے ہی کوئی پیشرفت ہوتی ہے تو عدالت کو آگاہ کیا جائے گا۔
عدالت نے مونس الٰہی اور شریک ملزم جبران کے ریڈوارنٹ پر رپورٹ اور پرویز الٰہی کی بریت کی درخواست پر دلائل طلب کر لیے۔
سابق وزیر اعلیٰ پنجاب نے حاضری مکمل کروائی۔ سماعت کے دوران فاضل جج نے پرویز الٰہی س خیریت دریافت کی تو انہوں نے بتایا کہ جی اب بہتر محسوس کر رہا ہوں۔
پراسیکیوٹر کا کہنا تھا کہ ترمیمی چالان کو سامنے رکھ کر اس درخواست پر بحث کریں گے، ہمیں اس کیلیے مہلت دی جائے۔
وکیل سابق وزیر اعلیٰ پنجاب نے کہا کہ یہ آج تک کوئی ثبوت پیش نہیں کر سکے، ایف آئی اے صرف زبانی جمع خرچ کر رہا ہے۔
عدالت نے کیس کی سماعت کل تک ملتوی کر دی۔