کراچی : پی آئی اے انتظامیہ نے فضائی میزبانوں کی ڈیوٹی کے اوقات میں اضافہ کردیا، اب 12 کے بجائے 16گھنٹے ڈیوٹی دینے کے پابند ہوں گے۔
تفصیلات کے مطابق پی آئی اے انتظامیہ نے کیبن کریو کے ڈیوٹی اوقات کار میں اضافہ کردیا، اب کیبن کریو کی ڈیوٹی کے اوقات کار بارہ گھنٹے سے بڑھا کر16گھنٹے کر دئیے گئے ہیں، چیف ایچ آر اے وی ایم ثوبان نذیر کے دستخط سے ایڈمن آرڈر جاری کریا گیا۔
نئے ایڈمن آڈر سے فضائی میزبان شدید ذہنی دباؤ کا شکار ہیں، پرانے اوقات کار میں بریفنگ اور ڈی بریفنگ کے ساتھ ڈیوٹی کے اوقات کار بارہ گھنٹے تھے۔
نئے اوقات کار بریفنگ اور ڈی بریفنگ کے ساتھ 16 گھنٹے کر دئیے گئے، نظر ثانی شدہ اوقات کار میں کیبن کریو کے لئے اسپیشل الاؤنسز اور مالی فوائد دئیے جانے کا اعلان بھی کیا گیا ہے۔
اس حوالے سے صدر کیبن کریو ایسوسی ایشن نصراللہ آفریدی کا مؤقف ہے کہ فلائٹ ڈیوٹی ٹائم لمیٹیشن میں اضافہ ایوی ایشن قوانین کی خلاف ورزی ہوگی، ایوی ایشن قوانین اور اور طبی ماہرین کے مطابق 12 گھنٹے سے زائد کام نہیں کر سکتے۔
جبکہ ترجمان پی آئی اے کا کہنا ہے کہ16گھنٹے فلائٹ ڈیوٹی ٹائم لیمیٹیشن سی اے اے قوانین کے مطابق ہے، نئے روسٹر سے اخراجات میں بچت اور کارکردگی بہتر ہوگی۔
دوسری جانب ترجمان سی اے اے کے مطابق پی آئی کیبن کریو کے 16 گھنٹے اوقات کار سی اے اے قوانین کے مطابق ہیں۔