پی آئی اے کے اہلکار سونا اسمگل کرتے ہوئے پکڑے گئے

ایف آئی اے نے باچا خان انٹرنیشنل ایئرپورٹ پشاور  پر کارروائی کرتے ہوئے کروڑوں روپے کے سونے کی بیرون ملک اسمگلنگ کی کوشش ناکام بنا دی۔

ایف آئی اےکمرشل بینکنگ سرکل پشاور اور اےایس ایف نےکارروائی کرتے ہوئے سونے کی بیرون ملک اسمگلنگ میں ملوث  پی آئی اے کے 2 اہلکاروں کو گرفتار کر لیا۔

ترجمان ایف آئی اے کا کہنا ہے کہ گرفتار ملزمان میں ناصر خان اور شاہد اللہ شامل ہیں اور ملزمان کے قبضے سے 7740 گرام سونا برآمد کر لیا گیا ہے۔

گرفتار ملزمان پشاور ایئرپورٹ پر تعینات ہیں اور ان سے برآمد شدہ سونا بیرون ملک اسمگل کیا جانا تھا۔

ترجمان کا کہنا ہے کہ ملزمان کا 2 روزہ جسمانی ریمانڈ حاصل کر لیا گیا ہے اور ان سے مزید تفتیش جاری ہے اور درکار معلومات ملنے پر دیگر کی گرفتاری کیلئے کارروائیاں کی جائیں گی۔