وزیراعظم کی بلوچستان میں خاتون، مرد کے قتل کی مذمت، وزیراعلیٰ کو تحقیقات کی ہدایت

وزیراعظم شہباز شریف نے بلوچستان میں خاتون اور مرد کے قتل کی مذمت کی ہے جبکہ وزیراعلیٰ بلوچستان کو واقعے کی تحقیقات کی ہدایت کردی۔

تفصیلات کے مطابق بلوچستان میں خاتون اور مرد کے قتل کا معاملہ اب ملک کے اعلیٰ ایونوں تک جاپہنچا ہے، وزیراعظم شہباز شریف نے وزیراعلیٰ بلوچستان سرفراز بگٹی سے اس سلسلے میں ٹیلیفونک رابطہ کیا اور اںھیں واقعے کی تحقیقات کی ہدایت کی ہے۔

انھوں نے کہا کہ واقعے میں ملوث افراد کو قانون کے مطابق سزا دی جائے، کوئی قانون سے بالاتر نہیں قانون ہاتھ میں لینے کی اجازت نہیں دی جاسکتی۔

وزیراعظم شہباز شریف کا مزید کہنا تھا کہ ملزمان کو قانون کے کٹہرے میں لانے کیلئے تمام تر قانونی اقدامات کیے جائیں۔

قتل ہونے والا جوڑا شادی شدہ نہیں تھا، وزیر اعلیٰ بلوچستان

خیال رہے کہ بلوچستان میں سردار کے فیصلے کے بعد مرد اور خاتون کو گاڑیوں میں سنجیدی ڈیگاری مارگٹ لاکر قتل کیا گیا تھا، خاتون اور مرد کے قتل کے واقعے کا مقدمہ تھانہ ہنہ اورڈک میں درج کیا گیا۔

مرد اور خاتون کے قتل کا مقدمہ انسداد دہشت گردی اور دیگر دفعات کے تحت متعلقہ ایس ایچ او نوید اختر کی مدعیت میں درج کیا گیا ہے۔

مدعی مقدمہ کا کہنا تھا کہ خاتون اور مرد کے فائرنگ سے قتل کی ویڈیووائرل ہوئی، پولیس نفری کے ساتھ جائے وقوعہ سنجیدی ڈیگاری مارگٹ پہنچی، معلومات کرنے پر علم ہوا کہ واقعہ عیدالاضحیٰ سے 3 روز قبل کا ہے۔

https://urdu.arynews.tv/balochistan-couple-incident-accused-sardar-sherbaz-satakzai-2-day-physical-remand/