ڈیووس : وزیراعظم عمران خان آج ورلڈاکنامک فورم سےخطاب کریں گے اور سوال و جواب کے سیشن میں سرمایہ کاری کے مواقع پرروشنی ڈالیں گے جبکہ عالمی رہنماؤں سےملاقاتیں بھی جاری ہیں۔
تفصیلات کے مطابق وزیراعظم عمران خان کی ڈیووس میں دوسرے روز مصروفیات کا شیڈول جاری کردیا گیا، وزیراعظم آج ورلڈاکنامک فورم میں ’’پاکستان اسٹریٹیجی ڈائیلاگ‘‘کے موضوع پر خطاب کریں اور سوال و جواب کے سیشن میں سرمایہ کاری کے مواقع پر روشنی ڈالیں گے۔
عمران خان عالمی سرمایہ کارکمپنیوں کے حکام سے بھی ملاقاتیں کریں گے جبکہ یوٹیوب کی سی ای او سوسن ووجیکی ، فیس بک چیف آپریٹنگ آفیسرشیرل سینڈبرگ سے بھی ملاقات شیڈول کا حصہ ہیں۔
وزیراعظم عمران خان کی ایشین ڈیولپمنٹ بینک کے صدر ، ٹیلی نار گروپ کی چیئرپرسن اور سی ای او بارکلے سے ملاقات متوقع ہے، جبکہ عالمی میڈیکل کونسل اور ڈبلیوای ایف کے خصوصی سیشن سے بھی خطاب کریں گے۔
وزیراعظم کا یورپی یونین پارلیمنٹ کےصدرڈیوڈسسولی سے بھی ملاقات کا امکان ہے۔
یاد رہے وزیراعظم عمران خان نے آذربائیجان کے صدراورسنگاپورکے وزیراعظم سے ملاقاتیں کی ، وزیراعظم نےالہام علیوف کومقبوضہ کشمیرکی سنگین صورتحال سےآگاہ کیا اور بتایا کہ مقبوضہ وادی میں غیرانسانی لاک ڈاؤن ہے۔
عمران خان نے کشمیر پر او آئی سی میں آوازاٹھانے پر آذربائیجان کو سراہا، صدرالہام علیوف نےوزیراعظم پاکستان کودورہ آذربائیجان کی دعوت بھی دی جبکہ سنگاپور کے وزیراعظم سےملاقات میں دوطرفہ تعلقات اوراقتصادی شعبےمیں تعاون بڑھانےپرگفتگو ہوئی۔
وزیراعظم سے ترک کمپنی کیلک ہولڈنگ کے چیئرمین بھی ملے، جس میں پاکستان میں توانائی ،تعمیرات، ٹیکسٹائل،معدنیات اور ڈیجیٹل سیکٹر میں سرمایہ کاری پربات ہوئی۔