اسلام آباد : وزیراعظم عمران خان نے وفاقی کابینہ کا اجلاس آج طلب کرلیا، اجلاس میں ملک کے تعلیمی نظام پر بحث کی جائے گی جبکہ بائیولوجیکل اور ٹاکسن ہتھیاروں کے کنونشن پرعمل کا بل پیش کیا جائے گا۔
تفصیلات کے مطابق وزیراعظم عمران خان کی زیر صدارت وفاقی کابینہ کا اجلاس آج اسلام آباد میں ہوگا، اجلاس میں 13 نکاتی ایجنڈے پر غور کیا جائے گا۔
وفاقی کابینہ کے اجلاس میں ایس ای سی پی کی سالانہ رپورٹ برائے مالی سال 2017۔18 پیش کی جائے گی جبکہ کابینہ ملک کے تعلیمی نظام پر بحث کرے گی اور بائیولوجیکل اور ٹاکسن ہتھیاروں کے کنونشن پرعمل کا بل پیش کیا جائے گا۔
اجلاس میں پیٹرولیم اور پاور ڈویژن کو الگ وزارت بنانے کی قومی اسمبلی سے منظور قرارداد پیش کی جائے گی جبکہ ورکرز ریکروٹمنٹ سے متعلق پاکستان سعودی عرب کے درمیان معاہدہ منظوری کے لیے پیش کیا جائے گا۔
زراعت کے شعبے میں آذربائیجان سے معاہدے کی منظوری، بیورو آف امیگریشن اینڈ اوورسیزامپلائمنٹ میں تبادلوں، تقرریوں کی منظوری، کراچی کی کسٹم اور اینٹی اسمگلنگ عدالت میں جج تعیناتی کی منظوری ایجنڈے میں شامل ہے۔
اجلاس میں وفاقی کابینہ ای سی سی کے فیصلوں کی توثیق کرے گی اور اقبال اکیڈمی لاہور کی گورننگ باڈی میں خرانچی کی منظوری دے گی۔
یاد رہے وزیر اعظم عمران خان کی زیر صدارت مہنگائی میں کمی پر خصوصی اجلاس میں سختی سے ہدایت کی تھی کہ ماہ رمضان میں کسی صورت مہنگائی نہیں ہونی چاہیے۔